युनिकोड
राष्ट्रिय प्रजातन्त्र पार्टी (राप्रपा) का केन्द्रीय सदस्य तथा युवा नेतृ खुश्बु ओलीले देशव्यापी युवा संवाद सुरु गर्ने भएकी छन्। अबको केही हप्तामा नेपालको सुदूरपश्चिमबाट सो यात्रा सुरु गर्ने र सातै प्रदेशमा पुग्ने आफ्नो योजना रहेको ओलीले जानकारी दिएकी छन्।
पहिलो चरणमा उनी सुदूपश्चिमका ९ वटै जिल्ला घुम्ने र स्थानीयसँग अन्तरक्रिया गर्ने योजना छ।
संवाद यात्रा थाल्नुअघि उनले भनेकी छन्, ‘आजको सबैभन्दा ठूलो चुनौती भनेको यहाँको जननतालाई सकेसम्म विदेश जानबाट रोक्नु र सकेसम्म युवा पलायन रोक्नु, उनीहरू आशाको किरण देखाउनु र उनीहरूलाई देशमा नै राख्नु हो।’
उक्त अभियानअन्तर्गत सातै प्रदेशमा घुम्ने, विशेषत: युवासँग अन्तरक्रिया गर्ने, उनीहरूका समस्या सुन्ने र समाधानको बाटो पहिल्याउने उद्देश्य रहेको उनको भनाइ छ। एउटा जिम्मेवार नागरिक र राजनीतिक दलको नेताको हैसियतमा देशले अहिले भोगेका समस्या समाधान गर्न पहल गर्नु आफ्नो दायित्व भएको उनले बताइन्।
‘आज प्रमुख राजनीतिक दलहरु सत्ता र शक्तिमा मात्र केन्द्रित हुँदा जनतासँगको सम्पर्क र संवाद टुटेको छ । यो सम्पर्क र संवादलाई पुनर्स्थापित गर्न मेरो यात्राले केही योगदान गर्नेमा म विश्वस्त छु’, ओलीले भनिन्।
उनले आफू राष्ट्रिय प्रजातन्त्र पार्टीको केन्द्रीय सदस्य भए पनि यो यात्रालाई सबै राजनीतिक दलहका युवा र कार्यकतालाई जोड्ने योजना रहेको बताइन्।
‘यो यात्रामा विशुद्ध राजनीतिभन्दा पनि समाजमा रहेका समस्या पहिल्याउने र त्यसलाई सम्बोधन गर्न सम्बन्धित निकायको ध्यान आकृष्ट गर्ने हो’, उनले भनिन्, ‘यस क्रममा मैले प्रदेश र जिल्लाको स्थानीय तहमा पुगेका समाजका सबै तह र तत्काका मानिसलाई भेट गर्ने र उनीहरूसँग अन्तरक्रिया गर्ने योजना बनाएको छु। यति मात्र होइन्, नागरिक समाज, स्वतन्त्र बद्धिजीवी लगायतका सबै पेसा र व्यवसायका व्यक्तिसँग मैले अन्तरक्रिया गर्ने छु । मलाई सबैको पूर्ण सहयोग हुने कुरामा म विश्वस्त छु।’
देशको आजको अवस्था कुनै एक राजनीतिक दल र व्यक्तिका कारण उत्पन्न भएको नभई यसमा हामी सबै राजनीतिक दल धेरथोर जिम्मेवार रहेको उनले बताइन्।
यात्रामा त्यहाँको वस्तुसस्थितिबारे एक बृहत् रिपोर्ट, भिडिओ सामाग्री तयार पार्ने र सरकार र सम्बन्धित निकायलाई बुझाउने योजना रहेको उनले जानकारी दिइन्। आफ्नो यात्राले अहिले देशले भोगेका समस्या समाधान गर्न सहयोग पुग्ने विश्वास उनले गरेकी छन्।
प्रतिक्रिया