युनिकोड
मन्त्रिपरिषद्ले सर्वोच्च अदालतको मुख्य रजिस्ट्रारमा न्याय परिषद्का सचिव देवेन्द्रराज ढकाललाई बढुवा गरेको छ। साथै, उनलाई नियुक्ति र पदस्थापन पनि गरेको छ।
नेपाल न्याय सेवा आयोगको सिफारिसमा राजपत्राङ्कित विशिष्ट श्रेणीका न्याय परिषद्का सचिव देवेन्द्रराज ढकाललाई नेपाल न्याय सेवाका राजपत्राङ्कित विशिष्ट श्रेणीको सर्वोच्च अदालको मुख्य रजिस्टार पदमा बढुवा नियुक्ति गरी पदस्थापन गर्ने निर्णय भएको सरकारका प्रवक्ता एवं सञ्चारमन्त्री रेखा शर्माले बताइन्।
योसँगै न्यायपालिकासँग सम्बन्धित ५ निर्णय मन्त्रिपरिषद्ले गरेको छ।
यस्तै न्याय सेवा आयोगको सिफारिसमा सर्वोच्च अदालतमा कार्यरत सहरजिस्टार विमल पौडेललाई सर्वोच्च अदालतको रजिस्टार पदमा बढुवा नियुक्ति गरी पदस्थापन गर्ने मन्त्रिपरिषद्को निर्णय छ।
यस्तै न्याय सेवा न्याय समूहका ५ जना राजपत्राङ्कित प्रथम श्रेणीका अधिकृतलाई सरुवा पनि गरिएको छ।
राजस्व न्यायाधीकरणमा कानुन सदस्य तथा अध्यक्ष पदमा उच्च अदालत तुल्सीपुर इजलासका न्यायाधीश टंकप्रसाद गुरुङलाई तोक्ने निर्णय पनि सरकारले गरेको छ। यसअघि न्याय परिषदले यस निर्णयका लागि परामर्श दिएको थियो।
प्रतिक्रिया