जल तथा मौसम विज्ञान विभागअन्तर्गत मौसम पूर्वानुमान महाशाखाले देशभर तापक्रम घट्दो तथा विभिन्न स्थानमा वर्षा र हिमपातका कारण चिसो बढ्ने सम्भावना देखिएकाले यसको असरबाट बच्ने उपाय अपनाउन आमनागरिकलाई सुझाव दिएको छ।
मौसम महाशाखाले आज (शनिबार) बिहान ६ बजे ‘आगामी २४ घण्टाका लागि चेतावनी तथा परामर्श’ जारी गर्दै चिसोले स्वास्थ्यमा पार्नसक्ने असरबाट जोगिन सचेत गराएको हो।
महाशाखाको २४ घण्टे चेतावनीमा भनिएको छ– सुदूरपश्चिम र कर्णाली प्रदेशका पहाडी भूभागका एक/दुई स्थानमा हल्का वर्षाको सम्भावना छ। साथै कोशी, गण्डकी, कर्णाली र सुदूरपश्चिम प्रदेशको उच्च पहाडी तथा हिमाली भूभागका एक/दुई स्थानमा हल्का हिमपातको सम्भावना रहेकाले आवश्यक सतर्कता अपनाउन तथा देशभरि तापक्रम घट्ने क्रममा रहेकाले चिसोबाट बच्न आवश्यक उपाय अपनाउन हुन सबैमा अनुरोध छ।
मौसम महाशाखाका अनुसार आज दिउँसो सुदूरपश्चिम र कर्णाली प्रदेशका पहाडी भूभागका एक/दुई स्थानमा हल्का वर्षा हुने सम्भावना छ भने कोशी, गण्डकी, कर्णाली र सुदूरपश्चिम प्रदेशका उच्च पहाडी तथा हिमाली भूभागका एक/दुई स्थानमा हल्का हिमपात हुने सम्भावना छ।
यस्तै आज राति पनि कर्णाली प्रदेशका पहाडी भूभागका एक/दुई स्थानमा हल्का वर्षा हुने सम्भावना छ भने कोशी, गण्डकी, कर्णाली र सदूर पश्चिम प्रदेशका उच्च पहाडी तथा हिमाली भूभागका एक/दुई स्थानमा हल्का हिमपात हुने सम्भावना छ।
मौसम महाशाखाका अनुसार भोलि आइतबार बागमती र गण्डकी प्रदेशको उच्च पहाडी तथा हिमाली भूभागका एक/दुई स्थानमा हल्का हिमपात हुने सम्भावना छ।
Shares
प्रतिक्रिया