प्रहरी कार्यालय धनुषाले यही माघ १८ मा सामान्य विवादमा धनुषा ओरही गाउँपालिका २ की २२ वर्षीया चिन्तामणि पासवानको हत्या गर्ने चार जनालाई पक्राउ गरेको छ। प्रहरीले घटनामा संलग्न औरही २ कै कमला पासवान, पुनिता पासवान, राधाकृष्ण पासवान र अनिलकुमार पासवानलाई पक्राउ गरेको हो।
पक्राउ परेकामध्ये अनिल चिन्तामणिका श्रीमान् हुन्। त्यस्तै राधाकृष्ण ससुरा, पुनिता नन्द र कुमला सासू हुन्।
चारै जनाले बुहारी चिन्तामणिको हत्या गरी फरार हुँदै आएका थिए। प्रहरीले खोजतलासका क्रममा कुमला र पुनितालाई जनकपुर उपमहानगर ४ स्थित पेठिया बजारमा आइतबार साँझ पक्राउ गरेको हो।
त्यस्तै राधाकृष्ण र अनिलकुमारलाई आज (सोमबार) बिहान जनकनन्दनी २ बलहा टोलमा लुकेर बसेको अवस्थामा पक्राउ गरेको हो। सबै चार जनाविरुद्ध प्रहरीले अनुसन्धान गरिरहेको छ।
माघ १८ गते के भएको थियो ?
मोबाइललाई लिएर बुहारी चिन्तामणि र नन्द पुनिताबीच सामान्य विवाद भएको थियो। सोही विषयलाई लिएर श्रीमान, नन्द, सासू र ससुराले बुहारीको घाँटी थिची हत्या गरेका थिए। बुहारीको हत्यापछि उनीहरुले अपराध लुकाउन शव झुण्ड्याएका थिए।
त्यसपछि टोलमा हल्लाखल्ला गरेर उनीहरुले शवलाई अटो रिक्सामा राखी उपचारको लागि भन्दै प्रादेशिक अस्पताल प्रदेश २ मा ल्याई आकस्मिक कक्षामा राखेकामा प्रहरीले अनुसन्धान सुरु गरेको थियो।
प्रतिक्रिया