युनिकोड
पछिल्लो एक महिनामा देशका विभिन्न स्थानमा चट्याङबाट ५ जनाको मृत्यु भएको छ भने ४३ जना घाइते भएका छन्।
राष्ट्रिय विपद् जोखिम न्यूनीकरण व्यवस्थापन प्राधिकरणका अनुसार गत वैशाख १ देखि जेठ १ गतेसम्ममा चट्याङका ४४ घटना भए। त्यसमा परेर ५ जनाको ज्यान गएको हो भने ४३ जना घाइते भएका हुन्।
प्राधिकरणका अनुसार गएराति चट्याङ लागेर दैलेखमा एकै घरका चारजना घाइते भएका छन्। डुङेश्वर गाउँपालिका–२ लाँकुरीका २१ वर्षीय पारस विक, १६ वर्षीया हेमा विक, १७ वर्षीया पूर्णा विक र २० वर्षीया पुष्पा विकलाई सुतिरहेकै बेला चट्याङ लागेको हो। घाइतेहरुको उपचार भइरहेको छ।
देशका पहाडी जिल्लामा हुरीबतास र मेघगर्जनसहित चट्याङ पर्ने क्रम जारी रहेकाले सावधानी अपनाउन मौसमविद् गोविन्द झाले आग्रह गरे। उनका अनुसार आज बागमती, कोशी, गण्डकी र कर्णाली प्रदेशका पहाडी क्षेत्रमा चट्याङ पर्ने सम्भावना छ। प्रिमनसुनमा चट्याङ पर्ने धेरै सम्भावना रहेको उनको भनाइ छ।
चट्याङ पर्दा शरीरमा त्यसको विद्युत् प्रवाह भएर घाइते हुने तथा ज्यान नै जाने खतरा हुने राष्ट्रिय विपद् जोखिम न्यूनीकरण व्यवस्थापन प्राधिकरणका प्रमुख कार्यकारी अधिकृत अनिल पोखरेलले जानकारी दिए।
चट्याङ पर्ने समयमा खेतबारीको काममा नजान र गड्याङगुडुङको आवाज सुनेपछि घरभित्र वा सुरक्षित ठाउँमा बस्न उनको सुझाव छ। अझै तीन/चार महिना चट्याङ पर्ने सम्भावना उच्च हुने भएकाले सावधानी अपनाउन प्राधिकरणले आग्रह गरेको छ। रासस
प्रतिक्रिया