युनिकोड
गृहमन्त्री बालकृष्ण खाणले लगातारको वर्षापछि अछामका विभिन्न स्थानमा आएको बाढी र पहिरोमा परी घाइते भएका, प्रभावित उद्धारका लागि तत्काल हेलिकोप्टर पठाउन गृह प्रशासनलाई निर्देशन दिएका छन्।
त्यही बाढी र पहिरोमा परी एकै परिवारका ५ जनासहित ९ जनाकाे मृत्यु भएको प्रारम्भिक जानकारी प्राप्त भएको छ।
बाढीपहिराेबाट घाइते तथा प्रभावितको उद्धारका लागि तत्काल हेलिकोप्टरको व्यवस्था गर्न गृहमन्त्री खाँणले गृहसचिव टेकनारायण पाण्डे, सुरक्षा तथा समन्वय महाशाखा प्रमुख फणीन्द्रमणि पोखरेल र विपद् तथा द्वन्द्व व्यवस्थापन महाशाखा प्रमुख प्रदीप कोइरालालाई निर्देशन दिएका हुन्।
अछामका प्रमुख जिल्ला अधिकारी विश्वराज मरासिनी र जिल्ला प्रहरी प्रमुख प्रहरी नायब उपरीक्षक नारायण डाँगीलाई टेलिफोन गरेर घटनाबारे जानकारी लिएका छन्।
गृहमन्त्री खाँणले प्रमुख जिल्ला अधिकारी मरासिनी र प्रहरी नायब उपरीक्षक डाँगीलाई सरकारको प्रमुख दायित्व नागरिकको जीउधनको रक्षा गर्नु भएको भन्दै बाढी र पहिरोमा परि घाइते भएकाको उद्धार, प्रभावितलाई सुरक्षित स्थानमा सार्न र औषधि उपचार तथा खाद्यान्नको व्यवस्थामा कुनै कसर बाँकी नराख्न निर्देशन दिएका छन्।
जिल्लामा भएका स्रोत र साधन अपुग भएमा मन्त्रालयमा तत्काल लेखी पठाउन पनि उनले निर्देशन दिएका छन्।
९ जनाको मृत्यु
अछामको कमलबजार नगरपालिका तथा ढकारी र तुर्माखाँद गाउँपालिकामा गरि अहिलेसम्म ९ जनाको मृत्यु भएको र २० जना घाइते भएको जानाकारी आएको प्रमुख जिल्ला अधिकारी विश्वराज मरासिनीले जानकारी दिए।
उनका अनुसार कमलबजार नगरपालिका वडा नं ६ को ठाँटीघाटमा गएको पहिरोमा परी ४ जनाको मृत्यु भएको छ भने ७ जना घाइते भएका छन्। घाइतेमध्ये ३ जनाको अवस्था गम्भीर रहेको जानकारी आएको उनले बताए।
त्यस्तै कमलबजारकै वडा नं ८ मा चाउरे दमाइको घर पुरिदाँ परिवारका ५ जनाको मृत्यु भएको जानकारी आएको पनि उनले बताए।
त्यस्तै ढकारी गाँउपालिकामा १ घर पुरिएर ३ जना घाइते भएको र एक जना पुरिएको जानकारीपछि खोजी भइरहेको जानकारी उनले दिए।
तुर्माखाद गाँउपालिकामा पनि ९ जना बेपत्ता भएको जानाकारी आएको जिल्ला प्रशासन कार्यालयले जनाएको छ।
अहिले पनि वर्षा निरन्तर भइरहेकाले उद्धारमा कठिनाई भइरहेको प्रजिअ मरासिनीले बताए।
प्रतिक्रिया