रौतहटको मठिया प्रहरी चौकीमा बम प्रहार गर्ने एक जना भारतीय नागरिक पक्राउ परेका छन्। बम प्रहार गर्ने भारत मोतीहारीका चन्दनकुमार रामलाई पक्राउ गरिएको रौतहट प्रहरी प्रमुख एसपी भुपेन्द्र खत्रीले जानकारी दिए।
नेपाल–भारत सीमानजिक इशनाथ गाउँपालिकाको मठियामा रहेको अस्थायी प्रहरी चौकीमा सुतली बम प्रहार हुँदा एक प्रहरी जवान सामान्य घाइते भएका छन्।
मंगलबार दिउँसो मोटरसाइकलमा आएको रामसहितको समूहले चौकीलाई लक्षित गरी बम प्रहार गरेको थियो।
एसपी खत्रीले बम प्रहार भएको र घाइतेको अवस्था सामान्य रहेको बताए। उनले आरोपितलाई जिल्लामा ल्याएपछि थप अनुसन्धान हुने बताए।
प्रहरीले राम सवार बीआर ०५८–६५०९ नम्बरको हिरो डिलक्स मोटरसाइकल समेत बरामद गरेको छ।
प्रतिक्रिया