युनिकोड
लुम्बिनी प्रदेश सरकारले आफ्नै नवनिर्मित प्रशासनिक भवनबाट औपचारिक रूपमा कामकाज सुरु गरेको छ।
सोमबार मुख्यमन्त्री चेतनारायण आचार्यले नयाँ प्रशासनिक केन्द्रबाट दैनिक कामकाजको शुभारम्भ गरेका छन।संघीयताको सुदृढीकरणका लागि प्रदेश तहलाई बलियो बनाउने लक्ष्यसहित प्रशासनिक केन्द्र निर्माण गरिएको बताउँदै मुख्यमन्त्री आचार्यले बताए।
‘सात प्रदेशमध्ये लुम्बिनी प्रदेश राजधानी निर्माण, नामकरण र प्रशासनिक केन्द्र निर्माणमा सफल भएको छ। यसले प्रदेशलाई थप उचाइमा पुर्याएको छ,’ मुख्यमन्त्री आचार्यले भने।
उनले समयमै आयोजना सम्पन्न गर्न सफल हुनु प्रदेश सरकारको महत्त्वपूर्ण उपलब्धि भएको पनि बताए। राप्ती गाउँपालिका–३ स्थित प्रशासनिक केन्द्रमा मन्त्रालय, निर्देशनालय तथा अन्य विभागले एकै परिसरबाट सेवा प्रवाह सुरु गरेका छन्।
यसअघि स्वास्थ्य मन्त्रालय, कृषि, भूमि व्यवस्था तथा सहकारी मन्त्रालय तथा उद्योग, पर्यटन तथा यातायात मन्त्रालय अलग–अलग स्थानबाट सञ्चालन हुँदै आएका थिए। अब ती सबै मन्त्रालय पनि यही परिसरबाट सञ्चालन हुने प्रमुख सचिव कृष्णप्रसाद काप्रीले जानकारी दिए।
काठमाडौँस्थित शर्मा–सगुन जेभीले निर्माण सम्पन्न गरेको प्रशासनिक केन्द्रका लागि प्रदेश सरकारले २०७९ मंसिर २८ गते ठेक्का सम्झौता गरेको थियो। सोही वर्ष फागुन ३ गते स्थापना दिवसको अवसर पारेर शिलान्यास गरिएको थियो।
कस्तो छ नयाँ प्रशानिक भवन?
प्रदेश राजधानी कार्यान्वयन एकाइका निमित्त प्रमुख इन्जिनियर प्रदीप भट्टराईका अनुसार मुख्यमन्त्री तथा मन्त्रिपरिषद् कार्यालयसहित १० वटा मन्त्रालय भवन निर्माण सम्पन्न भएका छन्। तीन अर्ब नौ करोड २९ लाख ३८ हजार ७२ रुपैयाँ लागतमा निर्माण गरिएको प्रशासनिक केन्द्र १७ बिघा १९ कट्ठा चार धुर क्षेत्रफलमा फैलिएको छ।
मुख्यमन्त्री तथा मन्त्रिपरिषद् कार्यालयबाहेक अन्य नौ वटा मन्त्रालय भवन एउटै डिजाइनमा निर्माण गरिएका छन् भने मुख्यमन्त्री कार्यालयको भवन फरक संरचनामा बनाइएको छ। अन्डरग्राउन्ड पार्किङसहित ६ तलाको मुख्यमन्त्री भवनमा सेतो रङ प्रयोग गरिएको छ भने अन्य नौ वटा भवन पाँच तलाका छन्। अन्य भवनमा रातो र सेतो रङ प्रयोग गरिएको छ। प्रत्येक भवनमा अलग–अलग लिफ्टको व्यवस्था गरिएको छ।
नयाँ प्रशासनिक केन्द्र सञ्चालनमा आएसँगै कामकाज थप सहज, प्रभावकारी र एकीकृत हुने अपेक्षा गरिएको छ। २०७९ मंसिर २८ गते प्रदेश सरकारले तत्कालीन राप्ती प्राविधिक शिक्षालयका भवनमा मन्त्रालयको काम थालेको थियो।
प्रतिक्रिया