नरवणेले भनेः सीमामा तनाव छ, तर हाम्रा जवान जुनसुकै चुनौतीको सामना गर्न तयार छन्

भारतीय सेनापति मनोज मुकुन्द नरवणेले चीनसँगको सीमामा परिस्थिति तनावपूर्ण रहेको बताएका छन्। उनले सैनिकहरु जुनसुकै चुनौतीको सामना गर्न पनि तयार रहेको बताए।

दुई दिने भ्रमणका लागि बिहीबार लद्दाख पुगेका नरवणेले शुक्रबार यस्तो बताएका हुन्।

‘लेह पुगेपछि मैले विभिन्न स्थानको भ्रमण गरेँ। अफिसरहरुसँग कुरा गरेँ, तयारीको अवस्था बुझेँ,’ नरवणेको भनाइ भारतीय सञ्चारमाध्यमले उधृत गरेका छन्, ‘जवानहरुको मनोबल उच्च छ। उनीहरु सबै चुनौती सामना गर्न तयार छन्।’

उनले भारतीय सैनिकहरु विश्वकै उत्कृष्ट सैनिक भएको दाबी पनि गरे।

गतसाता पाङगोङ ताल क्षेत्रमा भारत र चीनबीच पुनः तनाव उत्पन्न भएको छ। यद्यपि दुवै मुलुकले सैन्य र कूटनीतिक स्तरमा आपसी वार्ता जारी राखेका छन्। एजेन्सी