काठमाडौँमा सर्लाही-४ का मतदातासँग गगनले भने: फेरि चुनाव लड्न आऊ भन्नेगरी त्यहाँ काम गर्नेछु

नेपाली कांग्रेसका सभापति गगनकुमार थापाले काठमाडौँलाई मधेस बुझाउन सर्लाहीबाट उम्मेदवारी दिएको बताएका छन्।

गोकर्णेश्वर नगरपालिकामा बसोबास गर्दै विभिन्न व्यापार, व्यवसाय तथा पेसामा संलग्न सर्लाही क्षेत्र नं ४ का मतदातासँग शनिबार आयोजित अन्तरक्रिया कार्यक्रममा सभापति थापाले मधेस र काठमाडौँलाई जोड्न आफूले उम्मेदवारी दिएको बताएका हुन्।

उनले भनेे, 'मेरो परिवार पहाडबाट काठमाडौँ आउनुभयो, मैले आमाबाट पहाड बुझेँ। म काठमाडौँमा हुर्किएकाले सहर बुझेँ। अहिले पार्टी सभापति भएसँगै कांग्रेसलाई हुर्काउने र बढाउने मधेसलाई नबुझी राष्ट्रिय नेतृत्व गर्न सकिँदैन भन्ने लागेर मधेस आएको हुँ। मजस्तै काठमाडौँले मधेसलाई सतही रूपमा चिनेको छ, म आगामी पाँच वर्षमा काठमाडौँलाई मधेसको महत्त्व बुझाउने छु।'

आगामी पाँच वर्षमा मधेसको समग्र विकासमा योजनाबद्ध काम गरेर आम नागरिकको दैनिक जीवनमा परिवर्तन ल्याउने प्रतिबद्धता जनाए।

'सर्लाही-४ मा मेरो शिक्षा, स्वास्थ्य, प्रविधि, कृषिलगायत टोलीले अध्ययन गरेर त्यहाँ गर्नुपर्ने कार्यका बारेमा सुझाव दिनुभएको छ, आगामी पाँच वर्षमा त्यहाँ आवश्यकताका आधारमा काम गर्नेछु। जसरी अहिले मलाई काठमाडौँ-४ का बासिन्दाले यहीँ चुनाव लड्नुस् भनेर आग्रह गर्नुभएको थियो, आगामी पाँच वर्षमा सर्लाही-४ का बासिन्दाले पनि त्यस्तै आग्रह गर्ने गरी काम गर्नेछु', सभापति थापाले भने।

उनले आफ्नो ज्ञान र नेटवर्कको प्रयोग गरेर शिक्षा, स्वास्थ्य र उद्यमशीलताका विषयमा काम गर्ने भएकाले बिस्तारै समस्या कम हुँदै जाने विश्वास व्यक्त गरे।