युनिकोड
कुलमान घिसिङको उज्यालो नेपाल पार्टी र सर्वोदय पार्टीबीच चुनावी एकता भएको छ।
बुधबार इन्द्रेणी बैंक्वेटमा भएको कार्यक्रममा दुवै पार्टीले आपसी सहमति र साझा राजनीतिक दृष्टिकोणका आधारमा उज्यालो नेपाल पार्टीको चुनाव चिन्ह ‘बलेको चिम’ प्रयोग गर्दै संयुक्त रूपमा निर्वाचनमा सहभागी हुने निर्णय सार्वजनिक गरेका हुन्।
सहमतिमा उज्यालो नेपाल पार्टीका अध्यक्ष अनुपकुमार उपाध्याय र सर्वोदय पार्टीका अध्यक्ष दीपककुमार साहले हस्ताक्षर गरेका हुन्।
सम्झौताअनुसार प्रतिनिधि सभा निर्वाचनमा उज्यालो नेपाल पार्टीको दर्ता, संगठन संरचना र ‘बलेको चिम’ चुनाव चिह्न प्रयोग गरी संयुक्त उम्मेदवारी दिइने उल्लेख गरिएको छ। 
त्यस्तै प्रचार-प्रसारदेखि घोषणापत्रसम्म सबै कार्य संयुक्त रूपमा बनाइने र कुनै विवाद उत्पन्न भएमा दुवै पार्टीका शीर्ष नेताको संयुक्त बैठकमार्फत समाधान गरिने बताइएको छ।
दुवै पार्टीले पछिल्लो समय जनतामा बढ्दो सुशासन, दिगो विकास, सामाजिक न्याय, इमानदार र जनउत्तरदायी नेतृत्वप्रतिको चाहनालाई सम्बोधन गर्ने प्रतिबद्धता जनाएका छन्।
त्यस्तै लोकतन्त्र, संघीयता, समावेशीता, समानता तथा देश र मधेसको समग्र विकास र दिगो समृद्धिलाई एकताको मूल सन्देशका रूपमा अघि बढाउने प्रतिबद्धता व्यक्त गरेका छन्।
प्रतिक्रिया