युनिकोड
अख्तियार अनुसन्धान आयोगले इतिहासमै पहिलोपटक पूर्वप्रधानमन्त्रीविरूद्ध भ्रष्टाचार मुद्दा चलाएको छ।
अख्तियार दुरुपयोग अनुसन्धान आयोग ऐन, २०४८ लागू भएपछि गठन भएको यस शक्तिशाली संवैधानिक अंगले पहिलोपल्ट देशका पूर्वकार्यकारी प्रमुखलाई कानुनी कठघरामा उभ्याएको हो।
पतञ्जली योगपीठ तथा आयुर्वेद कम्पनी नेपालले काभ्रेपलाञ्चोक जिल्लाको नासिकास्थान साँगा, महेन्द्रज्योतिमा कम्पनी सञ्चालनको लागि हदबन्दीभन्दा बढी जग्गा खरिद गरेको, उक्त जग्गा कम मूल्यमा किनेर बढी मूल्यमा बेचबिखन गरेको र त्यसमा पूर्वप्रधानमन्त्री नेपालले सहयोग गरेको पाइएको भन्दै अख्तियारले विशेष अदालतमा भ्रष्टाचार मुद्दा दायर गरेको हो।
नेकपा एकीकृत समाजवादी पार्टीका अध्यक्ष एवं पूर्वप्रधानमन्त्री माधवकुमार नेपालमाथि बिहीबार विशेष अदालतमा भ्रष्टाचार मुद्दा दायर भएसँगै उनी यस्तो मुद्दा खेप्ने हालसम्मकै सर्वोच्च पदाधिकारी बनेका छन्।
२०६६ जेठ ११ देखि २०६७ माघ २२ सम्म उनी प्रधानमन्त्री भएका थिए। तत्कालीन अवस्थामा उनी काठमाडौँ र रौतहट गरी दुईवटा निर्वाचन क्षेत्रबाट पराजित भए पनि मन्त्रिपरिषद्बाट मनोनयन हुने कोटामा संविधान सभा सदस्य भएका थिए।
२०७९ को निर्वाचनमा रौतहट क्षेत्र नम्बर १ बाट प्रतिनिधि सभा सदस्यमा निर्वाचित भएका नेपाल अब सांसद पदबाटै निलम्बनमा परिसकेका छन्।
माधव नेपालविरुद्ध भ्रष्टाचार मुद्दा दायर
त्यसो त पूर्वप्रधानमन्त्री नेपाल यसअघि बालुवाटारस्थित ललिता निवासको जग्गा घोटाला प्रकरणमा पनि मुछिएका थिए।
अख्तियारको अनुसन्धानले उनी र पूर्वप्रधानमन्त्री बाबुराम भट्टराईलाई दोषी देखाए पनि मन्त्रिपरिषद्को निर्णयमा मुद्दा चलाउने अधिकार नभएको भन्दै उन्मुक्ति दिएको थियो। त्यतिखेर अख्तियार प्रमुख नवीन घिमिरे थिए।
त्यस प्रकरणमा बालुवाटारको सरकारी जग्गा व्यक्तिका नाममा गराउन माफियाको प्रभावमा परी मन्त्रिपरिषद्ले विभिन्न चरणमा निर्णय गरेको पाइएको थियो।
उक्त प्रकरणमा धेरै कागजातहरू नक्कली तयार गरेको पाइएपछि लिखतसम्बन्धी कसुरमा पनि नेपाल प्रहरीको केन्द्रीय अनुसन्धान ब्युरो (सीआईबी)ले मुद्दा चलाएको थियो। त्यतिखेर नेपालको घरैमा गएर नेपालसँग बयान लिए पनि उनलाई प्रतिवादी भने बनाइएन।
उनी र बाबुराम भट्टराईविरूद्ध पनि मुद्दा चलाउनुपर्ने माग गरी दायर गरिएको रिट सर्वोच्च अदालतमा विचाराधीन छ।
यसपालि पनि नेपाल नेतृत्वको मन्त्रिपरिषद्को निर्णयबाट सिर्जित भ्रष्टाचार प्रकरण नै अख्तियारले अदालत लैजाँदै छ। त्यसैले उनका लागि यो दोस्रो खड्गो बन्न पुगेको छ।
प्रतिक्रिया