युनिकोड
सत्तारुढ नेपाली कांग्रेसले सरकारले हिजो पेस गरेको नीति तथा कार्यक्रमलाई समर्थन गरेको छ।
शनिबार बानेश्वरमा बसेको संसदीय दलको बैठकले नीति तथा कार्यक्रमलाई सर्मथन गर्ने र नीति तथा कार्यक्रमका पक्षमा रचनात्मक सुझावसहित बोल्न सांसदहरुलाई निर्देशन दिने निर्णय भएको प्रमुख सचेतक श्यामकुमार घिमिरेले जानकारी दिए।
बैठकमा संसद्मा पेस भएको नीति तथा कार्यक्रम अनुसारै बजेट बनाउनुपर्ने समेत निर्णय गरेको छ। घिमिरेले यसबारे भने, ‘नीति तथा कार्यक्रम कार्यान्वयन हुन बजेटमा पनि समावेश हुनुपर्छ, अगामी बजेट तर्जुमा गर्दाखेरी नीति तथा कार्यक्रमलाई सम्बोधन गर्ने गरी तर्जुमा गरियोस् भनेर निर्णय गरेका छौँ।’
‘विधेयक निर्माणको गति अलिकति सुस्त भएको जस्तो हामीलाई अनुभव भएको छ, र विधेयक निर्माणको गति सुस्त हुँदाखेरि त्यसले पारेको प्रभावहरु धेरै हुने भए,’ घिमिरेले भने, ‘विधेयक निर्माणको गतिलाई तिब्रता दिन कांग्रेसले सक्रियतापूर्वक ढंगले संसदमा र समितिहरुमा भूमिका खेल्नुपर्छ र देखिनेगरी परिणाममुखी ढंगले संसद्मा भूमिका खेल्नुपर्छ भन्ने कुरा निष्कर्ष निकालेको छ।’
शिक्षकसँग गरिएको सहमतिअनुसार असार १५ गतेसम्म विद्यालय शिक्षा विधेयक संसद्बाट पारित गर्ने प्रतिवद्धता पनि बैठकले जनाएको छ।
प्रतिक्रिया