युनिकोड
प्रधानन्यायाधीश प्रकाशमानसिंह राउतले न्यायपालिकालाई लयमा फर्काउने कामलाई अझै प्रभावकारी र समृद्ध रुपमा अघि बढाउने बताएका छन्।
सोमबार संवैधानिक तथा न्यायिक पत्रकार मञ्चका पदाधिकारीहरूसँगको सामूहिक भेटमा उनले यस्तो प्रतिवद्धता व्यक्त गरेका हुन्।
नवनियुक्त प्रधानन्यायाधीश राउतले आफूसँग निष्ठा र निष्कलंक छवि भएका न्यायाधीशहरू रहेको दाबी गर्दै उनीहरूको जोडबलमा न्यायपालिकालाई लयमा फर्काउने कामलाई अझ प्रभावकारी ढंगले अघि बढाउने अठोट र संकल्प लिइएको पनि जिकिर गरे।
‘यो अदालत भनेको सबैको हो। नागरिकको हक र अधिकारको लागि यो अदालत प्रतिवद्ध छ। र नागरिक हक र अधिकारको प्रत्याभूतिको सन्दर्भमा यो अदालतले निर्वाह गर्नुपर्ने जुन भुमिकाहरू छ। यसमा हामी आफ्नो ठाउँबाट जे सम्पादन गर्नुपर्ने हो, त्यो हामी गरिहाल्छौँ।’
अदालतभित्र अफ्ठ्याराहरू, असहज परिस्थितिहरू रहेको उल्लेख गर्दै उनले त्यसलाई सल्ट्याउने दायित्व पूरा गर्ने बताउँदै उनले न्यायालयमा देखिएको चुनौती हटाउने काममा आफूहरूले सञ्चारकर्मीहरुबाट साथ र सहयोगको अपेक्षा गरेको पनि बताए।
‘हाम्रो देश सानो छ। जताततै चुनौती छ। राज्यको चौथो अंगमा पनि चुनौती देखिन्छ। हाम्रा अड्डा अदालतमा पनि निकै छन्। यताको म नैतिक जिम्मेवारी लिन तयार छु,’ पत्रकारमाझ प्रधानन्यायाधीश राउतले भने, ‘तपाईंहरूले मलाई सुझाउनुस्, यो अदालतभित्रको जे जति अफ्ठ्याराहरू, असहज परिस्थितिहरू छन्। यसलाई मैले सल्टयाउने नै हो। त्यसको मैले नैतिक जिम्मेवारी लिने पनि हो।’
प्रतिक्रिया