नेपाल–संयुक्त अधिराज्य (बेलायत) बीच सन्धी सम्पन्न भएको १ सय वर्ष पुगेको छ।
सन् १९२३ को सो सन्धि सम्पन्न भएको एक सय वर्ष पुगेको उपलक्ष्यमा आयोजित लण्डमा नेपाल–बेलायत सम्बन्धसँग सम्बन्धित ऐतिहासिक ऐतिहासिक सामग्रीहरू प्रदर्शन गरिएको छ।
परराष्ट्र मन्त्रालयले प्रदर्शनीमा दस्तावेज, पाण्डुलिपि, तस्वीर, अन्य सामग्री राखिएको जनाएको छ।
द्विदेशीय मैत्री सन्धिले नेपाल–बेलायत सम्बन्धको विकासमा जग निर्माण गर्न महत्वपूर्ण भूमिका खेलेको परराष्ट्रसचिव भरतराज पौड्यालले बताएका छन्।
नेपाल–संयुक्त अधिराज्यबीच परामर्श संयन्त्रको बैठकका लागि लण्डन पुगेका परराष्ट्र सचिव पौड्यालले मंगलबार साँझ आफ्नो स्वागत तथा दुई मुलुकबीचको ऐतिहासिक सम्बन्ध झल्काउने सामाग्रीहरुको प्रदर्शनमा उपरोक्त कुरा बताएका हुन्।
त्यो सन्धिका कारण दुई मुलुकबीच विकास साझेदारी, व्यापार र लगानी, पर्यटन, डायस्पोरा, ब्रिटिश गोर्खा र जनता–जनताबीचको सम्बन्ध, पारस्परिक हित लगायत बहुपक्षीय मञ्चहरूमा सहकार्यमा महत्वपूर्ण रूपमा विकास भएको पनि परराष्ट्र सचिव पौड्यालले उल्लेख गरे।
बेलायतको विदेश, राष्ट्रमण्डल तथा विकास कार्यालय र लण्डनस्थित नेपाली राजदूतावासले ब्रिटिस लाइब्रेरीसँगको सहकार्यमा सो कार्यक्रम गरेको हो।
नेपालका ऐतिहासिक पाण्डुलिपि, तस्वीर मोनोग्राफ र अन्य बहुमूल्य सामग्रीको संरक्षण, संरक्षण र डिजिटलाइजेशनमा ब्रिटिश पुस्तकालयले गरेको सहयोगकोपनि परराष्ट्र सचिव पौड्यालले प्रशंसा गरेका थिए।
सो कार्यक्रममा संयुक्त अधिराज्यका विदेश, राष्ट्रमण्डल तथा विकास कार्यालयका राज्यमन्त्री एनी–मारी ट्रेभल्यानले दुई देशबीचको लामो समयदेखिको सम्बन्धको चर्चा गरेकी थिइन्। नेपालको दीगो आर्थिक विकासका लागि बेलायतले निरन्तर सहयोग गर्ने बचनपनि उनले दिइन्।
‘प्राथमिकतामा राखिएका व्यापार र लगानीको क्षेत्रहरू मार्फत् नेपाललाई अति कम विकसित देशको स्थितिबाट स्तरोन्नति गर्नेमा हाम्रो सहयोग रहनेछ,’ उनले भनिन्।
सो अवसरमा संयुक्त अधिराज्यका लागि नेपाली राजदूत ज्ञानचन्द्र आचार्य र ब्रिटिस लाइब्रेरीका संकलन प्रमुख जेरक्सेस माज्दाले पनि नेपाल–संयुक्त अधिराज्य सम्बन्धबारे आफ्नो धारणा राखेका थिए।
Shares
प्रतिक्रिया