युनिकोड
प्रतिनिधिसभाको उपसभामुखमा दुईजना महिला सांसद भिड्ने भएका छन्।
संसद सचिवालयले सार्वजनिक गरेको कार्यतालिका अनुसार सत्ता साझेदार दलबाट इन्दिरा रानामगर र कांग्रेस नेतृत्वको विपक्षी गठबन्धनबाट मुक्ताकुमारी यादवले उम्मेदवारी दर्ता गराएका छन्।
नेकपा एमाले नेकपा माओवादी केन्द्र नेतृत्वको सत्ता गठबन्धनको तर्फबाट राष्ट्रिय स्वतन्त्र पार्टी (रास्वपा) की समानुपातिक सांसद इन्दिरा राना मगरले उपसभामुखमा उम्मेदवारी दिएकी छन्।
उनको उम्मेदवारीमा रास्वपा सांसद सोविता गौतम प्रस्तावक बसेकी छन्। यसअघि सोबिता उपसभामुखको उम्मेदवार बन्ने चर्चा थियो।
तर रास्वपा सभापति रवि लामिछानेले रानामगरलाई उपसभामुखमा उठाउने निर्णय लिए। उनलाई सत्ता साझेदार दलका सांसदहरु कृष्णगोपाल श्रेष्ठ, नारायणी शर्मा र राजेन्द्र प्रसाद लिङ्देनले समर्थन गरेका छन्।
चर्चित सामाजिक अभियन्तासमेत रहेकी राना मगर शनिबार हुने उपसभामुखको निर्वाचनमा निर्वाचित हुने करिब निश्चित जस्तै छ।
अर्कातिर नेपाली कांग्रेसकी समानुपातिक सांसद मुक्ताकुमारी यादवले पनि बिहीबारै दिउँसो उपसभामुखमा उम्मेदवारी दिउकी छन्।
पार्टीका सहमहामन्त्रीसमेत रहेका प्रतिनिधिसभा सदस्य बद्री पाण्डेको प्रस्तावमा उनले उपसभामुखका लागि उम्मेदवारी दिएकी हुन्।
यादवको उम्मेदवारीमा प्रतिनिधिसभा सदस्यद्वय नेकपा एकीकृत समाजवादीका मेटमणि चौधरी र लोकतान्त्रिक समाजवादी पार्टी (लोसापा) का सवेन्द्रनाथ शुक्ल समर्थक छन्।
उपसभामुख चयनका लागि शनिबार निर्वाचन हुने भएको छ। सभामुखका नेकपा एमालेका सांसद देवराज घिमिरे विजयी भइसकेका छन्।
बिहीबार भएको निर्वाचनमा एमालेका तर्फबाट प्रतिनिधिसभा सदस्य रहेका देवराज घिमिरे कांग्रेस सांसद ईश्वरी न्यौपानेलाई पराजित गर्दै सभामुखमा निर्वाचित भए। उनी झापा २ बाट निर्वाचित भएका थिए।
कसले जित्ला?
अहिलेसम्म सभामुखमा घिमिरेको समर्थनमा उभिएका दलहरुको संख्याका आधारमा उपसभामुखमा रानामगरको जित निश्चित छ।
रानामगरको पक्षमा एमालेका ७७, माओवादी केन्द्रका ३२, राष्ट्रिय स्वतन्त्रब पार्टी (रास्वपा) का २०, राप्रपा १४, जनता समाजवादी पार्टी (जसपा) १२, जनमत पार्टी ६, नागरिक उन्मुक्ति पार्टीका ४ सांसद छन्। यस्तै स्वतन्त्र तीन सांसदले पनि उनलाई नै साथ दिने सम्भावना छ। यस्तो हुँदा रानामगरको पक्षमा १६९ सांसद हुनेछन्।
कांग्रेसबाट उसभामुखकी उम्मेदवार यादवको पक्षमा अहिलेसम्मको अवस्थामा बहुमत पुग्ने सम्भानाव छैन।
यादवको पक्षमा नेपाली कांग्रेसका ८८ एकीकृत समाजवादीका १० र लोकतान्त्रिक समाजवादी पार्टी (लोसपा) का ४ सांसद मात्रै हुँदा सभामुखमा जस्तै पराजय हुने अवस्था छ।
प्रतिक्रिया