युनिकोड
नेकपा एमालेका नेता डा. भीम रावलले पार्टी नछाड्ने भएका छन्।
अछाम क्षेत्र नम्बर १ बाट सिफारिस हुँदा पनि अध्यक्ष केपी शर्मा ओलीले टिकट खोसिदिएपछि आक्रोशित उनले बिहीबार पत्रकार सम्मेलन गर्दै पार्टीमै बसेर संघर्ष गर्ने बताएका हुन्।
ओलीमाथि दर्जनौँ आरोप लगाएका उनले अहिलेको अवस्थामा मंसिर ४ गते हुने आमनिर्वाचनमा पार्टीलाई जिताउनु आफ्नो प्राथमिकता रहेको बताएका छन्।
उनले अन्तिम बिन्दुसम्म पनि पार्टीलाई ठीक ठाउँमा ल्याउने विश्वास आफूमा रहेको बताए।
'जसरी अहिले दक्षिणपन्थी र प्रतिक्रियावादीहरूसँग एमालेले साँठगाँठ गरेको छ। यो विकृत अवस्थाबाट पार्टीलाई बाहिर निकाल्न सकिने मलाई विश्वास छ', उनले भने, 'एमाले कसैको कम्पनी र व्यक्तिगत सम्पत्ति पनि होइन। एमालेसँग करोडौं जनता र कार्यकर्ताको भरोसा छ। त्यसैले म अन्तिम बिन्दुसम्म पनि पार्टीमै बसेर संघर्ष गर्न तयार छु।'
रावलले अछाम १ को टिकट ओलीले खोसे पनि आफू पार्टीलाई जिताउन निर्वाचनमा होमिने बताए।
'म अब पार्टी र पार्टीका उम्मेदवारलाई जिताउने अभियानमा होमिन्छु', उनले भने, 'त्योबाहेक अहिलेलाई मेरो अर्को उद्देश्य छैन। पार्टीलाई दक्षिणपन्थीहरुको हातबाट बाहिर निकाल्न अन्तिम समयसम्म संघर्ष गर्नेछु।'
प्रतिक्रिया