युनिकोड
नेपालको पाँच दिने औपचारिक भ्रमणमा आएका भारतीय स्थल सेनाध्यक्ष जनरल मनोज पाँडे स्वदेश फर्किएका छन्।
प्रधान सेनापति प्रभुराम शर्माको औपचारिक निमन्त्रणामा नेपाल आएका भारतीय सेनाका सेनापति पाँडे तथा श्रीमती अर्चनालाई त्रिभुवन अन्तर्राष्ट्रिय विमानस्थलमा बलाधिकृत रथी बालकृष्ण कार्कीले बिदाइ गरे।
नेपाल र भारतका सेनाध्यक्षहरुलाई एक अर्का देशको मानार्थ महारथीको दर्जाबाट सुशोभित गर्ने परम्पराको निरन्तरता स्वरुप यही भदौ २० गते राष्ट्रपति विद्यादेवी भण्डारीले भारतीय स्थल सेनाध्यक्ष पाँडेलाई नेपाली सेनाको मानार्थ महारथीको दर्जाबाट सुशोभित गरेकी थिइन्।
सोही दिन जनरल पाँडेको सम्मानमा सेनापति प्रभुराम शर्माले जङ्गी अड्डामा रात्रीभोज आयोजना गरे।
भ्रमणकै दौरान, जङ्गी अड्डामा प्रधान सेनापति शर्मा र भारतीय स्थल सेनाध्यक्ष पाँडेबीच औपचारिक भेटवार्ता भएको थियो। उक्त भेटवार्ताका क्रममा दुई देशको आपसी सुरक्षा चासोका विषयहरुमा छलफल भएको नेपाली सेनाले जनाएको छ।
साथै, उनी जङ्गी अड्डामा आयोजित विभिन्न कार्यक्रमहरुमा सरिक भए भने शिवपुरीस्थित सैनिक कमाण्ड तथा स्टाफ कलेज र पोखरास्थित नेपाली सेनाको मध्य कमाण्ड हेड क्वाटरको समेत भ्रमण गरेका थिए।
यस भ्रमणले दुई देशबीच रहँदै आएको सौहार्दपूर्ण सैनिक सम्बन्धलाई अझ सुमधुर एवं प्रगाढ पार्न थप मद्दत पुग्ने विश्वास नेपाली सेनाले लिएको छ।
प्रतिक्रिया