चितुवासँग भिडेर चेपाङ दम्पतीले जोगाए चार वर्षीय छोरा

तनहुँका एक दम्पतीले चितुवासँग लडेर छोरालाई बचाएका छन्।

बन्दीपुर गाउँपालिका–१, कौ सिनीछापका चन्द्रबहादुर चेपाङ र सानीमाया चेपाङले आफ्ना चार वर्षका छोरा अक्कल चेपाङलाई चितुवाबाट बचाएका खबर आजको गोरखापत्र दैनिकले छापेको छ।

डिभिजन वन कार्यालय तनहुँका सहायक वन अधिकृत मनोज रानाभाटका अनुसार आइतबार साँझ बारीमा काम गरेर आमाबुबासँगै आउने क्रममा बालकलाई चितुवाले आक्रमण गरेको थियो।

साथमै रहेको छोरालाई चितुवाले आक्रमण गरेपछि बाबाआमा चितुवामाथि जाइलागे पछि चितुवा भागेको थियो। चन्द्रबहादुर चेपाङले चितुवाले छोराको घाँटीमा समातेपछि दुवै जना चितु्वामाथि जाइलागेका थिए।

चितु्वाको आक्रमणबाट बालकको घाँटीमा चोट लागेको छ भने चितुवासँग भिड्दा बाबा र आमालाई सामान्य चोट लागेको डिभिजन वन कार्यालयले जनाएको छ।