युनिकोड
बोक्सीको आरोपमा दिसा खुवाएर निर्घात कुटपिट गरिएकी मूर्तिदेवी यादव उपचारपछि तंग्रिएलिन् भन्ने आस गरेका थिए, परिवारजनले।
तर, उनी भने अस्पतालबाट फर्केको एक साता बितिसक्दा पनि सामान्य दैनिकीमा फर्किन सकेकी छैनन् । घरमा भेट्न आउने आफन्तजनलाई टोलाएर हेर्छिन्, केही बोल्दिनन्, बरर आँसु मात्रै झार्छिन्। यो खबर आजको नयाँ पत्रिका दैनिकमा सिरहाबाट मणिलाल विकले लेखेका छन्।
मंगलबार मध्याह्न सिराहाको नवराजपुर गाउँपालिका– ५ कुर्सन्डी गाउँस्थित घरमा उनी मूर्तिजस्तै बसिरहेकी थिइन् । उनलाई भेट्न आफन्तजन आइरहेका थिए । उनी सबैका कुरा एकनासले सुनिरहेकी थिइन्।
आफन्तले ढाडस दिइरहेका थिए । तर, उनी भने कसैसँग पनि एक शब्दसमेत बोलिनन् । आफन्तजनले बोलेको सुनिरहिन् । उनीहरूलाई टोलाएर हेरिरहेकी उनले बीचबीचमा बरर आँसु मात्रै झारिन्।
उनलाई भेट्न आएका आफन्तजन पनि निन्याउरो मुहार लगाएर फर्किन्छन् । उनी नबोलेपछि उनकी छोरी संगीतासँग कुराकानी गर्छन् । ‘विक्षिप्त हुनुहुन्छ । केही बोल्नुहुन्न, अरूले सम्झाउँदा रुनु मात्रै हुन्छ,’ छोरी संगीताले भनिन् । आफूहरूसँग पनि नबोल्ने गरेको संगीनाले सुनाइन्।
कुटपिटबाट मूर्तिदेवीको अनुहारको बायाँपट्टिको चारवटा दाँतले ठाउँ छोडेको छ भने चिउँडोको हड्डी भाँचिएर स्टिल हालिएको छ । उनले २४ दिनदेखि ठोस खानेकुरा खान पाएकी छैनन् । त्यसैले होला उनको शरीर पनि गलेको छ। ‘
मुख नै चलाउन नमिल्ने भएकाले जुस, दालको झोल, दूध मात्रै खुवाइरहेका छौँ । अन्य खानेकुरा खुवाउन सकिएको छैन,’ संगीताले भनिन्।
बोक्सीको आरोपमा स्थानीयले २७ भदौको मध्यराति मन्दिरमा लगेर निर्घात कुटपिट गरेका थिए । सख्त घाइते भएकी उनको धरानस्थित बिपी कोइराला स्वास्थ्य विज्ञान प्रतिष्ठानमा उपचार भएको थियो । १३ दिन अस्पताल बसाइपछि उनी ११ असोजमा गाउँ फर्किएकी थिइन्।
फेरि पनि उनको परिवारलाई पीडकहरूले धम्क्याउन छाडेका छैनन् । अप्रत्यक्ष रूपमा कुटपिट गर्नेका आफन्तले घटना सार्वजनिक गरी गाउँको बदनाम गराएको भन्दै धम्की दिइरहेको मूर्तिदेवीका पति रामनारायणले बताए। ‘
गाउँको घटना मिडियामा दिएको र त्यही कारण मुद्दा दर्ता भएको छ भनेर धम्की दिइरहेका छन्,’ रामनारायणले भने, ‘राम्रो हुँदैन भन्दै अप्रत्यक्ष रूपमा धम्क्याउन थालेका छन्।’
प्रतिक्रिया