युनिकोड
सुनसरीको चतरास्थित आश्रममा बस्ने सिद्धबाबा भनिने कृष्णदास गिरी प्रहरीको निगरानीमा परेका छन्।
आफ्नै अनुयायी एक महिलाले आफूमाथि गत ४ कात्तिकमा बलात्कार गरेको उजुरी प्रहरीमा दिएपछि उनी निगरानीमा परेका हुन् ।
सुनसरी प्रहरी प्रवक्ता डिएसपी विनोद भण्डारीले कृष्णदास प्रहरीको निगरानीमा रहेको जानकारी दिँदै पक्राउका लागि अदालतबाट पुर्जी प्राप्त गर्ने प्रयत्नमा रहेको बताए ।
‘अदालतबाट पक्राउ पुर्जी प्राप्त हुनासाथ नियन्त्रणमा लिएर अनुसन्धान थाल्नेछौँ,’ डिएसपी भण्डारीले भने। यो खबर आजको नयाँ पत्रिका दैनिकले छापेको छ।
आफूविरुद्ध प्रहरीमा बलात्कारको उजुरी परेपछि कृष्णदास अस्पताल भर्ना भएका छन् । उनी बिहीबार दिउँसो बिरामी भएको भन्दै विराटनगर मुनालपथस्थित विराट नर्सिङ होम भर्ना भएका हुन् ।
हाल उनी अस्पतालको दोस्रो तलामा रहेको गाइनो वार्डको ५ नम्बर क्याबिनमा बसिरहेका छन् । मुटुमा समस्या आएपछि उनी उपचारका लागि भर्ना भएको चिकित्सकहरूको भनाइ छ ।
कृष्णदासले आफूमाथि झुटो आरोप लगाइएको बताए । उनले समय आएपछि सबैलाई बोलाएर यथार्थ जानकारी दिने बताए । ‘मैले बोल्ने समय आएको छैन, सही समय आएपछि तपाईंहरू सबैलाई बोलाएर के भएको हो बोल्छु,’ उनले भने ।
कृष्णदासले आफूमाथि लागेको आरोपबारे अनुसन्धान गर्न बाधा नगरेको र नगर्ने पनि बताए । ‘कानुनअनुसारको काम प्रहरीले गर्ने हो, मैले यो वा त्यो भन्न मिल्दैन, सत्य के हो आफैँ बाहिर आउनेछ,’ उनले भने ।
कृष्णदासका अनुयायीहरूले भने ‘गुरु’लाई नियोजित रूपमा फसाएको दाबी गरेका छन् ।
उनीहरूले एक वर्षदेखि एक युवतीले कृष्णदासको मोबाइलमा यौनव्यवहार लक्षित सयौँ म्यासेज पठाएको बताएका छन् । युवतीले गरेको आग्रह नमान्दा झुटो बलात्कार आरोपको उजुरी दर्ता गराएको अनुयायीहरूको दाबी छ।
प्रतिक्रिया