नेपालको पहिलो रेलबारे लेखिएको पुरानो कविता

श्री ३ चन्द्र शमशेरको अगुवाइमा बनेको रक्सौल–अमलेखगन्ज रेलमार्गको ५ फागुन १९८३ का दिन राजा त्रिभुवनले उद्घाटन गरेका थिए। नेपालको यो पहिलो रेलमार्गबारे इतिहासमा प्रशस्तै चर्चा भएका छन्। यहाँ राणा शासनमा खरदारको जागिर खाएका हीरालाल खत्रीले कविता मार्फत सो रेल र श्री ३ चन्द्रको प्रशस्ति गाएका छन्।

गोर्खापत्रमा प्रकाशित यो कविता कमलमणि दीक्षित, शरद्‍चन्द्र शर्मा र घटराज भट्टराई सम्पादित एउटा अर्को बुइँगलबाट साभार गरिएको हो :

श्री चन्द्रका किरणले दुनियाँ प्रजा ती
विद्या विचार सब पाइ अनेक भाँति
आनन्द मानी शुभकीर्तनले नछाई
बस्छौं समस्त प्रभुको गुणगान गाई।

फेरी मधेशतिर खर्च लगाउँदामा
सफ्फा बन्यो सटक गैहृ कृपा हुँदामा
आनन्दमा छ दुनियाँ अब छैन ताप
श्रीमान चन्द्र प्रभुको त हुँदा प्रताप।

भीमफेदि देखि अब वायु सरी कुदेर
अम्लेखसम्म लहरीहरुमा छुटेर
जान्छन् समस्त दुनियाँ सव मार्ग ताडी
आनन्दसाथ चढि मोटरको त गाडी।

अम्लेखबाट पनि जो ति दुसाँदसम्म
चड्छन् समस्त दुनियाँ भइ रेल गम्म
हर्षाश्रुपूर्ण गरि सूक्तिसुधा प्रपात
आनन्द पारिदिनु भो सब रोज रात।