भारतमा नाबालिगलाई सामूहिक बलात्कार गरी जिउँदै जलाउने २ जनाविरुद्ध फाँसीको फैसला

भारतीय प्रान्त राजस्थानको भिलवाडा जिल्लाको कोटडीमा एक नाबालिगलाई सामूहिक बलात्कारपछि जिउँदै जलाएको मुद्दामा सोमबार अदालतले फाँसीको सजाय सुनाएको छ।

उक्त अपराधमा दोषी ठहर दुई जनालाई भिलवाडाको पोक्सो अदालत–२ ले मृत्युदण्डको सजाय सुनाएको हो। 

बीबीसी हिन्दीका अनुसार २०२३ अगस्ट २ मा भएको यो घटनापछि प्रहरीले अनुसन्धान गरी नौ जनालाई पक्राउ गरेको थियो। तर तीमध्ये गत शनिबार अदालतले सात जनालाई सफाइ दिएको थियो भने कालु र कान्हालाई दोषी ठहर गरेको थियो।

ती दुई दोषीविरुद्ध अदालतले सोमबार फाँसीको फैसला गरेको हो।

दुवै दोषीलाई मृत्युदण्डको सजाय सुनाइएपछि मृतक नाबालिकाकी आमाले अदालतबाहिर सञ्चारकर्मीसँग कुरा गर्दै अब न्याय पाएको बताइन्।