अमेरिकाको प्रस्तावमा इरानको जवाफ: युद्ध अन्त्यका लागि यी ५ सर्त पूरा हुनुपर्छ

युद्ध अन्त्यका लागि अमेरिकाले पठाएको १५ बुँदे प्रस्तावको जवाफमा इरानले पाँच सर्त प्रस्तुत गरेको छ।

इरानको सरकारी टीभी च्यानल प्रेस टीभीका अनुसार इरानले अमेरिकाले पठाएको युद्धविराम प्रस्तावलाई अस्वीकार गर्दै यसका लागि ५ सर्त पूरा हुनुपर्ने बताएको हो। 

प्रेस टीभीले नाम नखुलाइएका अधिकारीलाई उद्धृत गर्दै भनेको छ, ‘इरानले आफ्नै सर्तमा युद्ध समाप्त गर्नेछ।’

प्रेस टीभीका अनुसार यी हुन् इरानले राखेका ५ सर्त:

- शत्रुबाट भइरहेका आक्रमण र हत्याको पूर्ण अन्त्य।

- इरानविरुद्ध फेरि आक्रमण नगर्ने समाधान

- युद्धबाट भएका हानि-नोक्सानीको क्षतिपूर्ति दिने ग्यारेन्टी

-- सबै मोर्चामा र यस क्षेत्रभरि संलग्न सबै समूहका लागि युद्ध अन्त्य

-होर्मुज स्ट्रेटमा इरानको अधिकार हुने कुरामा अन्तर्राष्ट्रिय स्तरबाट मान्यता र सुनिश्चितता

प्रेस टीभीका अनुसार वासिङ्टनले विभिन्न कूटनीतिक माध्यममार्फत वार्ता गर्ने प्रयास गरिरहेको छ तर तेहरान मानिरहेको छैन। 

अमेरिका-इजरायले गत फेब्रुअरी २८ मा संयुक्त हवाई हमला गरी इरानका सर्वोच्च नेता अयातोल्लाह अली खामेनीलगायत शीर्ष नेता तथा अधिकारीको हत्या गरेयता निरन्तर युद्ध जारी छ। 

यसबिच इरानका सर्वोच्च राष्ट्रिय सुरक्षा परिषद्का सचिव अली लारिजानी र इस्लामिक रिभोलुसनरी गार्ड कोर्प्स (आईआरजीसी) का प्रवक्ता तथा जनसम्पर्क अधिकारी अली मोहम्मद नैनी पनि मारिइसकेका छन्। 

अमेरिका-इजरायलको आक्रमणबाट इरानमा अहिलेसम्म ३ हजारभन्दा बढी जनाको मृत्यु भइसकेको अमेरिकास्थित ह्युमन राइट्स एक्टिभिस्ट न्युज एजेन्सी (एचआरएएनए) ले जनाएको छ। 

साथै इरानले गरेका आक्रमणका कारण इजरायल तथा अमेरिकी आधार रहेका खाडीका मुलुकहरूमा पनि मानवीय तथा भौतिक क्षति भएका छन्।