युनिकोड
अमेरिकाका राष्ट्रपति डोनाल्ड ट्रम्पले बुधबार डाभोसमा भएको विश्व आर्थिक मञ्चमा सम्बोधन गरेका छन्। यस क्रममा उनले ग्रिनल्यान्ड, कर, नेटो र युरोपलगायत धेरै विषयमा विचार राखे।
यी हुन् ट्रम्पको भाषणका मुख्य १० कुरा:
युरोप: आफ्नो भाषणको सुरुमा ट्रम्पले भने, 'युरोप सही दिशामा गइरहेको छैन।' उनले यसमा 'बढ्दो सरकारी खर्च, अनियन्त्रित सामूहिक बसाइँसराइ र अनन्त विदेशी आयात' कारण रहेको दाबी गरे।
ग्रिनल्यान्ड: ट्रम्पले डेनमार्कबाट ग्रिनल्यान्ड प्राप्त गर्न तत्काल वार्ता चाहेको बताए। उनले भने, 'अमेरिकाले मात्र यो विशाल भूमि, यो विशाल बरफको टुक्रा जोगाउन सक्छ।'
ग्रिनल्यान्ड-आइसल्यान्ड: डोनाल्ड ट्रम्पले डाभोस सम्बोधनमा 'ग्रिनल्यान्ड' पटकपटक उल्लेख गरे। तर कतिपटक उनले भुलेर ग्रिनल्यान्डको ठाउँमा आइसल्यान्ड पनि भने।
बल प्रयोग: यसलाई आफ्नो भाषणको सबैभन्दा ठुलो कुरा भन्दै ट्रम्पले आफू बल प्रयोगको पक्षमा नरहेको दाबी गरे। उनले भने, 'मलाई बल प्रयोग गर्न आवश्यक छैन। म बल प्रयोग गर्न चाहन्नँ। म बल प्रयोग गर्दिनँ।'
नेटो: ग्रिनल्यान्ड कब्जाले नेटोलाई हानि पुर्याउने दाबी ट्रम्पले अस्वीकार गरे। उनले भने, 'हामी धेरै दिन्छौँ र बदलामा धेरै कम पाउँछौँ।'
अर्थतन्त्र: ट्रम्पले आफ्नो कार्यकालमा अमेरिकाले 'आर्थिक चमत्कार' गरेको दाबी गरे। उनले भने, 'महँगी घटेको छ र यसअघि कुनै देशले आर्थिक वृद्धि हासिल गरेको छ।'
भन्सार: उनले भने, 'यो आर्थिक प्रगतिको एउटा कारण विदेशी देशहरूमा लगाइएको भन्सार शुल्क हो, ताकि उनीहरूले गरेको क्षतिको पूर्ति गर्न सकियोस्।'
आप्रवासन: ट्रम्पले भने, 'युरोपले टाढाका देशहरूबाट पूर्ण रूपमा फरक जनसंख्या ल्याइरहेको छ। साँच्चै भन्ने हो भने युरोपका केही भाग अहिले चिन्न नसकिने भएका छन्।'
युक्रेन: ट्रम्पले भने, 'म राष्ट्रपति पुटिनसँग कुरा गरिरहेको छु र मलाई विश्वास छ- उहाँ सम्झौतामा पुग्न चाहनुहुन्छ। म राष्ट्रपति जेलेन्स्कीसँग पनि कुरा गरिरहेको छु र मलाई विश्वास छ- उहाँ पनि सम्झौता चाहनुहुन्छ।'
चीनको वायु फार्म: ट्रम्पले भने, 'चीनले ठूलो संख्यामा वायु टर्बाइन उत्पादन गर्दछ, तर मैले चीनमा कतै पनि वायु फार्म फेला पार्न सकिनँ। यद्यपि बीबीसीले यो दाबीलाई असत्य ठानेको छ। विश्वको सबैभन्दा ठूलो वायु फार्महमध्ये एक चीनको गान्सु प्रान्तमा छ।'
प्रतिक्रिया