युनिकोड
अमेरिकाका राष्ट्रपति डोनाल्ड ट्रम्पले रुसलाई ‘कागजी बाघ’को संज्ञा दिएका छन्। साथै उनले युक्रेनले युद्धमा ‘गुमाएको भूमि फिर्ता लिन सक्ने’ चेतावनीसमेत बताएका छन्।
ट्रम्पको यो अभिव्यक्तिलाई रुस-युक्रेन द्वन्द्वमा उनको अडानमा ठूलो परिवर्तन मानिएको छ।
सामाजिक सञ्जाल प्लेटफर्म ट्रुथ सोसलमा ट्रम्पले लेखेका छन्, ‘युरोप र नेटोको समर्थन र रुसको अर्थतन्त्रमा बढ्दो दबाबका साथ युक्रेनले यो युद्ध सुरु भएको ठाउँबाट आफ्नो मूल सिमाना फिर्ता प्राप्त गर्न सक्छ।’
यस क्रममा उनले "युक्रेन र रुसको सैन्य र आर्थिक अवस्थालाई पूर्ण रूपमा जानीबुझी सकेपछि" आफ्नो विचार परिवर्तन भएको पनि उल्लेख गरेका छन्।
उनले रुसलाई ‘कागजी बाघ’को संज्ञा दिँदै अगाडि भनेका छन्, ‘पुटिन र रुस ठूलो आर्थिक समस्यामा छन् र युक्रेनले कारबाही गर्ने समय आएको छ।’
ट्रम्पले उक्त टिप्पणी मंगलबार न्युयोर्कमा संयुक्त राष्ट्र संघको महासभालाई सम्बोधन गरेपछि युक्रेनका राष्ट्रपति भोलोदिमिर जेलेन्स्कीसँग भएको भेटपछि गरेका हुन्।
यसअघि भने ट्रम्पले युद्धविराम गर्न वा सम्झौतामा पुग्न युक्रेनले आफ्नो केही भूभाग त्याग्नुपर्ने बताएका थिए।
प्रतिक्रिया