इरानको दाबी: कतारनजिकै अमेरिकी जहाजमा आक्रमण गर्‍यौँ

इरानी समाचार एजेन्सी फार्सले ‘विश्वसनीय स्रोत’लाई उद्धृत गर्दै कतारको तटमा आक्रमण गरिएको मालवाहक जहाज अमेरिकी भएको दाबी गरेको छ।

इरानको सरकारी समाचार एजेन्सीले पनि स्रोतलाई उद्धृत गर्दै हमलामा परेको जहाज अमेरिकाकै स्वामित्वमा रहेको र अमेरिकी झन्डा रहेको दाबी गरेको छ। 

यस विषयमा अमेरिकाबाट भने अहिलेसम्म कुनै प्रतिक्रिया आएको छैन।

यसअघि बेलायतको समुद्री व्यापार सञ्चालन प्राधिकरणले कतारको राजधानी दोहाबाट लगभग ४३ किलोमिटर उत्तरपूर्वमा रहेको जहाजमा ‘अज्ञात प्रकारको प्रक्षेपण’बाट प्रहार भएको बताएको थियो।

उसका अनुसार आक्रमणले जहाजमा सामान्य मात्र क्षति भएको छ। हमलापछि आगो लागेको थियो तर पछि नियन्त्रणमा लिइयो।