युनिकोड
पाकिस्तानी सेनाले भारतले राति पन्जाबको सियालकोट र बहावलपुर साथै आजाद जम्मु-कश्मीरसहित ६ स्थानमा गरेको आक्रमणको बदलामा पाँच भारतीय जेट विमान खसालेको दाबी गरेको छ।
पाकिस्तानी सञ्चारमाध्यम डनका अनुसार बुधबार बिहान १ बजेपछि भारतले ‘अपरेसन सिन्दूर’ सुरु गरेपछि पाकिस्तानसँग सैन्य टकराव सुरु भएको थियो।
इन्टर-सर्भिसेज पब्लिक रिलेसन्स (आईएसपीआर) ले भारतले आफ्नो हवाई क्षेत्र भित्रबाट आक्रमण गरेको पुष्टि गरेको छ।
पाकिस्तानको एक सैन्य प्रवक्ताले ८ जना सर्वसाधारणको मृत्यु भएको बताएका छन्।
पाकिस्तानका सूचना मन्त्री अताउल्लाह तरारले बिहान २:४५ बजे दुई भारतीय जेट विमान खसालेको र यसको एक घण्टापछि तेस्रो विमान खसालेको दाबी गरेका छन्।
यस्तै बिहान ५ बजेपछि तरार र रक्षामन्त्री ख्वाजा आसिफले चौथो र पाँचौँ भारतीय जेट विमान खसालेको पुष्टि गरेको भनेर डनले लेखेको छ।
हताहतको तथ्यांकबारे थप विवरण दिँदै आईएसपीआरका महानिर्देशक लेफ्टिनेन्ट जनरल अहमद शरिफ चौधरीले ६ वटा क्षेत्रमा भारतीय आक्रमणमा मारिएका सर्वसाधारणको संख्या २६ पुगेको र ४६ जना घाइते भएको बताए।
यता भारतीय सञ्चारमाध्यमको भने आफ्नै दाबी छ। यस क्रममा भारतीय पत्रिका दैनिक भास्करले आक्रमणमा सयभन्दा बढी आतंककारी मारिएको दाबी गरेको छ भने भारततर्फ क्षतिबारे केही उल्लेख गरेका छैन।
प्रतिक्रिया