जब एक कोरियाली महिला सैनिकको बन्दुक खोस्न अघि सरिन् (भिडिओ)

मंगलबार राति राष्ट्रपति युन सुक योलले जंगी शासन घोषणा गरेपछि दक्षिण कोरियालीहरू केही समयलाई आत्तिए। तर, त्यस्तोमा एक महिलाले देखाएको बहादुरीको भने धेरैले चर्चा गरेका छन्।

सैन्य शासन घोषणापछि सशस्त्र सैनिकहरू संसद् भवनमा पसे। उनीहरूको बाटो छेकेर ती महिला उभिइन्।

३५ वर्षीया आन ग्वी रियोङ विपक्षी डेमोक्र्याटिक पार्टीकी एक प्रवक्ता हुन्। उनी संसद् भवनमा आइपुग्दा भर्खरै रातिको ११ बजेको थियो।

आकाशमा हेलिकोप्टर उडिरहेका थिए।

उनी मुख्य भवनमा पुग्दा सरकारी अधिकारी, सांसदका सहयोगी र सर्वसाधारणसँग सैनिकहरू धकेलाधकेल गरिरहेका थिए।

जब सैनिकहरू अघि बढ्न थाले, तब आन उनीहरूलाई रोक्न अघि सरिन्।

‘साँच्चै भन्दा सुरुमा मलाई डर लागेको थियो। तर, धकेलाधकेल देखेपछि मलाई लाग्यो, म चुप बस्न सक्दिनँ। जसरी पनि मैले रोक्नुपर्छ भन्ने लाग्यो,’ उनको भनाइ बीबीसीले उधृत गरेको छ।