भारतीय प्रहरीको गुप्त अध्ययन भन्छ : लद्दाखमा चीन र भारतका सैनिकबीच थप झडप हुनसक्छ

लद्दाख क्षेत्रमा आगामी दिनमा भारतीय र चिनियाँ सैनिकबीच थप झडप हुने निष्कर्ष भारतीय प्रहरीको एक सुरक्षा अध्ययनले निकालेको छ। सो क्षेत्रमा चीनले सैन्य पूर्वाधार निर्माण गरिरहँदा झडपको सम्भावना झन् बढेको लद्दाख प्रहरीको आकलन छ।

लद्दाख प्रहरीले गरेको नयाँ र गोप्य अध्ययनपछि यस्तो निष्कर्षसहितको प्रतिवेदन जनवरी २० देखि २२ सम्म भएको प्रहरी अधिकारीहरुको बैठकमा पेस गरिएको थियो।

स्थानीय प्रहरीले सीमा क्षेत्रमा जम्मा गरेको सूचनाका आधारमा सो निष्कर्ष निकालिएको प्रतिवेदनमा उल्लेख छ।

यसबारे भारतीय सेनाले कुनै प्रतिक्रिया दिएको छैन। तर, प्रहरी अधिकारीहरुको सो बैठकमा प्रधानमन्त्री नरेन्द्र मोदी पनि उपस्थित भएकाले प्रतिवेदनलाई महत्वपूर्ण मानिएको छ।

‘चीनको आन्तरिक बाध्यता र यो क्षेत्रमा उनीहरुको आर्थिक स्वार्थलाई हेर्दा चिनियाँ जनमुक्ति सेनाले सैन्य पूर्वाधार निर्माणलाई निरन्तरता दिनेछ। जसका कारण झडप पनि बारम्बार हुनसक्छ,’ प्रतिवेदनमा भनिएको छ।

‘झडप र तनावको ढाँचालाई विश्लेषण गर्ने हो भने यसको सघना २०१३–१४ देखि बढेको छ। हरेक दुई तीन वर्षमा अलिकति विराम पनि देखिन्छ,’ रिपोर्टमा भनिएको छ, ‘दुवै देशका सेनाले एकअर्काको प्रतिक्रिया, तिनको तोपगोलाको शक्ति र पैदल सैनिक परिचालन समयको परीक्षण गरिरहेका छन्। 

२०२० मा यी दुई मुलुकका सैनिकबीच झडप हुँदा २० भारतीय र ४ चिनियाँ सैनिकको ज्यान गएको थियो। त्यसपछि अनेक चरणका सैन्य र कूटनीतिक वार्तापछि तनाव मत्थर भएको थियो। 

हालै पूर्वी क्षेत्रमा पर्ने अरुणाचलमा दुई मुलुकका सैनिक फेरि भिडेका थिए। तर, यसपटक कसैको ज्यान गएन। रोयटर्स