युनिकोड
फिल्म ‘लज्जावती’ की मुख्य अभिनेत्री मेनुका माझी यतिबेला सिनेमाको प्रचारमा व्यस्त छिन्। यससँगै उनी ‘फेस अफ नेपाल-२०२६’ को तेस्रो संस्करणलाई पनि अघि बढाइरहेकी छन्।
उनी यस प्रतियोगिताकी राष्ट्रिय निर्देशक हुन्। मेनुकाले अभिनयसँगै ‘फेस अफ नेपाल’ मार्फत नयाँ प्रतिभाको खोजी र उनीहरूको क्षमता विकासमा पनि सक्रिय भूमिका निर्वाह गरिरहेकी छन्।
एमएस प्रोडक्सन प्रालिले आयोजना गर्ने फेस अफ नेपाल-२०२६ को तेस्रो संस्करणका लागि आवेदन खुला गरिएको छ। प्रतियोगितामा नेपालभरका १७ देखि ३० वर्ष उमेर समूहका युवाले सहभागिता जनाउन सक्नेछन्।
इच्छुक सहभागीले फेस अफ नेपालको आधिकारिक सामाजिक सञ्जाल पेज तथा प्रतियोगिताको आधिकारिक भोटिङ पार्टनर एभेन्टोजमार्फत आवेदन दिन सक्नेछन्। आवेदनका लागि एक हजार रुपैयाँ दर्ता शुल्क लाग्नेछ भने छनोट भएका प्रतियोगीले १५ हजार रुपैयाँ सहभागिता शुल्क तिर्नुपर्नेछ।
आयोजकका अनुसार प्रतियोगिता विभिन्न चरणमा सञ्चालन हुनेछ, जहाँ आत्मविश्वास, व्यक्तित्व, प्रतिभा, सिर्जनशीलता तथा मोडलिङ क्षमताको मूल्यांकन गरिनेछ। त्यस्तै, सहभागीले फिटनेस तथा व्यक्तित्व विकास, ग्रुमिङ, व्यावसायिक स्टाइलिङ, मोडलिङ तथा स्टेज प्रस्तुति प्रशिक्षणलगायत विभिन्न व्यावसायिक तालिम प्राप्त गर्नेछन्।
यस प्रतियोगिताका विजेताले दक्षिण कोरियामा आयोजना हुने प्रतिष्ठित एसिया मोडल फेस्टिभलमा नेपालको प्रतिनिधित्व गर्ने अवसर प्राप्त गर्नेछन्। साथै राष्ट्रिय तथा अन्तर्राष्ट्रिय मोडलिङ तथा फेसन उद्योगमा व्यावसायिक रूपमा अघि बढ्ने अवसरसमेत पाउनेछन्।
प्रतियोगिताकी राष्ट्रिय निर्देशक मेनुकाले फेस अफ नेपाल नेपाली युवालाई राष्ट्रिय तथा अन्तर्राष्ट्रिय मोडलिङ क्षेत्रमा आफ्नो क्षमता प्रदर्शन गर्ने महत्त्वपूर्ण अवसर भएको बताइन्। उनका अनुसार यस प्रतियोगिताले आत्मविश्वास, व्यक्तित्व र प्रतिभालाई प्राथमिकता दिने भएकाले यसमा सहभागी हुन कुनै उचाइको मापदण्ड नराखिएको जानकारी दिइन्।
यस वर्षको ग्रान्ड फिनाले ३० अगस्ट २०२६ (भदौ १४) मा काठमाडौंस्थित रोयल टुलिपमा आयोजना हुनेछ। कार्यक्रममा फेसन तथा मनोरञ्जन क्षेत्रका चर्चित व्यक्तित्वहरूको सहभागिता रहने आयोजकले जनाएको छ।
फेस अफ नेपाल-२०२६ अन्तर्राष्ट्रिय प्रतिष्ठित एसिया मोडल फेस्टिभल, दक्षिण कोरियाको नेपालको आधिकारिक फ्रेन्चाइजका रूपमा सञ्चालन हुँदै आएको प्रतियोगिता हो।
प्रतिक्रिया