युनिकोड
कर्णाली प्रदेशका अनगिन्ती कथा, कला, संस्कृति र पर्यटनलाई विश्वमाझ चिनाउने उद्देश्यले ‘तेस्रो कर्णाली अन्तर्राष्ट्रिय चलचित्र महोत्सव २०८३’ आयोजना हुने भएको छ।
बिहीबार पत्रकार सम्मेलनमार्फत महोत्सवको विस्तृत कार्ययोजना तथा पहिलो चरणका कार्यक्रमहरूबारे औपचारिक जानकारी गराइएको हो।
कर्णालीलाई चलचित्र पर्यटनको केन्द्र बनाउने बृहत् लक्ष्यसहित आयोजना हुन लागेको यस महोत्सवले राज्यको न्यून उपस्थिति रहेको यस क्षेत्रमा चलचित्रका माध्यमबाट सामाजिक, आर्थिक र शैक्षिक रूपान्तरण ल्याउने दाबी गरेको छ।
‘घूमौँ कर्णाली, हेरौँ कर्णाली’ भन्ने मूल नारा र ‘जनजनमा नेपाली चलचित्र, मनमनमा नेपाली चलचित्र’ भन्ने अभियानका साथ वीरेन्द्रनगरस्थित होटल शुभमा सुरु भएको छ।
यसैगरी, महोत्सवको दोस्रो दिन वैशाख १२ गते सल्यानको प्रसिद्ध पर्यटकीय स्थल कुपिण्डे दहमा विशेष ‘कुपिण्डे चलचित्र पर्यटन समारोह’ आयोजना गरिने कार्यतालिका छ।
महोत्सवले कर्णालीका लुकेका कथा, जीवनशैली, भाषा र भेषभूषालाई चलचित्रको पर्दामार्फत विश्वसामु पुर्याउने लक्ष्य राखेको छ। पत्रकार सम्मेलनमा बोल्दै महोत्सवका निर्देशक चक्र बहादुर चन्दले कर्णालीमा प्रचुर सम्भावना भएर पनि चलचित्र र पर्यटनका गतिविधि शून्यप्रायः रहेको अवस्थामा यो महोत्सव एउटा कोसेढुङ्गा साबित हुने बताए।
संघीय, प्रदेश र स्थानीय सरकारसँग समन्वय गरी कर्णालीको माटो र कथालाई विश्व मानचित्रमा स्थापित गर्दै यस क्षेत्रलाई अन्तर्राष्ट्रिय ‘सुटिङ हब’ का रूपमा विकास गर्ने महोत्सवको दीर्घकालीन योजना रहेको निर्देशक चन्दले स्पष्ट पारे।
यस वर्षको महोत्सवको विशेष आकर्षणका रूपमा ‘चलचित्र कथा प्रतियोगिता’ लाई अघि सारिएको छ। कर्णालीका लुकेका र ओझेलमा परेका कथा उजागर गर्ने उद्देश्यले आयोजना गरिएको यस प्रतियोगिताको उत्कृष्ट कथालाई एक लाख रुपैयाँ नगद पुरस्कार प्रदान गरिनेछ।
आयोजकका अनुसार उक्त प्रतियोगिताको नतिजा छिट्टै सार्वजनिक गर्ने तयारी भइरहेको छ। चलचित्र र पर्यटनलाई जोडेर स्थानीय स्तरमा रोजगारी सिर्जना गर्ने र आयआर्जन बढाउने लक्ष्य बोकेको छ। यस महोत्सवले जलवायु परिवर्तनले पारेको गम्भीर असरबारे पनि चलचित्रकै माध्यमबाट जनमानसमा सचेतना जगाउने संकल्प लिएको छ।
प्रतिक्रिया