एक्सनले भरिएको विराजको फिल्म ‘राम नाम सत्य’ को टिजर, देखिए सुनिल थापा पनि

बहुप्रतिक्षित फिल्म ‘राम नाम सत्यः पर्दा भित्रको पर्दा’ को टिजर सार्वजनिक भएको छ। सार्वजनिक फिल्मको टिजर एक्सन, सस्पेन्स, प्रेम र थ्रिलले भरिएको छ। 

फिल्मको टिजरमा मुख्य अभिनेता विराज भट्टलाई एक्सन अवतार देख्न सकिन्छ। फिल्ममा विराजसँगै अर्का अभिनेता सुशील श्रेष्ठ पनि आक्रामक र एक्सन लुकमै देखिएका छन्। दुबैको एक्सन अवतारले टिजरले फिल्मप्रति दर्शकको उत्सुकता बढाउने निश्चित छ।

टिजरमा दिंवगत अभिनेता सुनिल थापालाई पनि देख्न सकिन्छ। उनी फिल्ममा खतनाक भिलेनको भूमिकामा देखिएका छन्। सम्भवत:यो थापाको अन्तिम फिल्म समेत हो। किनकी निधन हुँदा थापा यसै फिल्मको सुटिङ गरिरहेका थिए। तर, अन्तिम सिन सकाउन बाँकी राख्दै घर फर्किएका सुनिलको त्यसैरात निधन भएको थियो। 

फिल्ममा विराज, सुशील र सुनिलसहित दिव्या रायमाझी, सुपुष्पा भट्ट, आयुष सिंह ठकुरी, सुनिल थापा, प्रशान्त ताम्राकार, खुशी कार्की लगायतका कलाकारहरुको अभिनय छ। टिजरमा यी सबै कलाकारहरुलाई देख्न सकिन्छ ।

माइकल चन्दको निर्देशनमा तयार भएको यो फिल्मको टिजरले चैत्र २७ गतेबाट रिलिज हुँदैछ। माइकल इन्टरटेन्मेन्टको व्यानरमा निर्माण भएको यो फिल्ममा उपेन्द्र शाही र स्वेता बिमलीको लगानी छ। 

अभिमन्यू निरवी र समय थपलिया फिल्मका स्क्रिप्ट सल्लाहाकार हुन्। माइकल चन्दकै कथा र पटकथा रहेको फिल्ममा साहिल खानले टिजर र ट्रेलर तयार पारेका हुन् ।

फिल्ममा समावेश ‘धागोले बाटेको’ बोलको गीत सुपरहिट भइसकेको छ । यसैबिच, यो टिजरले पनि दर्शकको आक्रामक साथ पाउने विश्वास गरिएको छ ।