बनेको ५ वर्षपछि प्रदर्शन हुँदै ‘नीरफूल’, कस्तो छ फिल्म?

निर्माण सम्पन्न भएको पाँच वर्षपछि चलचित्र ‘नीरफूल’ प्रदर्शन हुने भएको छ। यो चलचित्र यही जेठ २६ गतेदेखि प्रदर्शन हुने निर्माण पक्षले जानकारी दिएको छ। 

शुक्रबार साँझ आयोजित पत्रकार सम्मेलनमा चलचित्रका निर्देशक फूलमान बलले चलचित्रमार्फत सामाजिक कथा भन्न खोजिएको जानकारी दिए।

‘चलचित्रमा भूकम्प, त्यसपछि निम्तिने परिस्थिति, नागरिकले भोग्ने सास्तीलगायतका विषय समेटेको छु। यो चलचित्रले त्यो समयलाई पर्दामा जीवित राखेको छ’, निर्देशक बलले भने। 

भूकम्पका कारण विछोडिएका एक परिवारको सदस्यले पुनःमिलनका लागि गरेको प्रयत्नमा आधारित चलचित्रमा दयाहाङ राई, रेखा थापा, शान्ति वाइबा, बुद्धि तामाङ, पुष्कर गुरुङ, जिम्मे छ्योइकी घिसिङ, राजन खतिवडा, सरोज अर्याल, सरिता गिरीलगायतले अभिनय गरेका छन्। 

‘मलाई सधैँ बाँचिरहने चलचित्रमा अभिनय गर्न मन थियो किनकि ती चलचित्र जहिले देखाउन सकिन्छ। यस्तै चलचित्र बनेको छ’, अभिनेता राईले भने, ‘यसले हाम्रै समाजको कथालाई हाम्रै सुन्दर दृश्यमार्फत व्यक्त गरेको छ। हामीले नेपालको सुन्दरता देखाउने प्रयास गरेका छौँ।’

भत्किएका मन र सम्बन्धको पुनःनिमाणको कथा समेटिएको चलचित्र विविध कारण प्रदर्शन हुन समय लागेको निर्देशक बलले बताए। उनले भने, ‘हामीले प्रदर्शन तय गरेको समयमा कोरोना भाइरसका कारण सम्भव भएन। त्यसपछि अहिले बल्ल तय भएको छ। प्रदर्शन ढिला हुँदा निर्माण लागत पनि बढेको छ।’

रुवि भ्याली र काठमाडौँमा छायाङ्कन गरिएको चलचित्र आफूले खोजेझैँ भएको अभिनेता खतिवडाले बताए। ‘कहिले पैसा र कहिले कथाले मजस्ता कलाकारलाई चलचित्रमा आबद्ध हुन बाध्य बनाउँछ। तर यसमा दुवै पाएँ’, उनले भने। आयोजित पत्रकार सम्मेलनमा चलचित्रको गीत तथा ट्रेलर पनि देखाइएको थियो। 

सचिन घिमिरे एसोसिएट निर्देशक रहेका चलचित्रमा प्रमोद कार्कीले छायाङ्कन, निमेष श्रेष्ठलले सम्पादन, अर्जुन पोखरेल र चन्द्रकुमार दोङले सङ्गीत दिएका छन्। रासस