कसको जीवनमा कुन वर्ष अन्तिम बनेर आइपुग्छ...

कसको जीवनमा कुन वर्ष अन्तिम बनेर आइपुग्छ, के थाहा? गायिका नीरा छन्त्यालको जीवनमा पनि भइदियो, त्यस्तै। ख्यालख्यालमै गाएको गीत आफ्नै जीवनमा मेल खान आइपुग्यो। कस्तो दुर्भाग्य! 

प्रत्यक्ष दोहोरीमा चर्चित गायक राजु परियारसँगको घम्साघम्सीमा नीराले जवाफ फर्काएकी थिइन्–

‘हे...सब मरिन्छ, त्यही अन्तिम वर्षमा
बाँचुञ्जेली बाँचम् न हर्षमा...’

जीवनलाई खुसीसाथ जिउनुपर्छ भन्ने उनै नीरा आज आफन्त र शुभेच्छुकलाई शोकमा छाडेर आफू भने भौतिक संसारबाट अलप भएकी छन्। २२ वर्षको अल्पायुमै उनको इहलीला सकिएको हो। 

पोखराको सेतीखोँचमा आइतबार भएको यती एयरलाइन्सको जहाज दुर्घटनासँगै नीराको मखमली आवाज पनि उतैकतै बिलायो। लोकदोहोरी क्षेत्रमा जबर्जस्त उदाएकी गायिका छन्त्यालले असमयमै मृत्युवरण गर्नुर्‍यो। 

गत वर्ष उनी आफैँले गाएको गीतले भनेझैँ नीराका लागि यस वर्ष (२०७९) नै अन्तिम बन्यो। न अब कतै युट्युबमा, न मेला र महोत्सवका झकिझकाउ मञ्चमा उनलाई प्रत्यक्ष हेर्न र सुन्न नै पाइने छ। केवल स्वजनका स्मृति र आफ्ना सिर्जनामा नीरा बाँचिरहनेछिन्। 

बागलुङको बडिगाड गाउँपालिका-३ सिसाखानीमा जन्मिएकी नीराको जीवनभर नेपाली लोकसङ्गीतको सेवा गर्ने उत्कट अभिलाषामा पनि ठेस पुगेको छ। 

लोकगायक विष्णु खत्रीले नेपाली सङ्गीत जगत्ले एउटा प्रतिभावान् कलाकार गुमाएको प्रतिक्रिया दिइन्। ‘प्रत्यक्ष लोकदोहोरीमा उनको छुट्टै पहिचान बनिरहेको थियो, मञ्चीय कार्यक्रममा उनको प्रस्तुति आकर्षक हुने गर्थ्यो, गायक खत्रीले सम्झिए। 

गायक खत्री र गायिका छन्त्यालको सहकार्यमा गत वर्ष पञ्चेबाजा गीत ‘फूल केशरी’ सार्वजनिक भएको थियो। ‘बैनीले अर्को गीत गर्नुपर्छ है दाइ भनिरहनुभएको थियो, नयाँ शैलीको दोहोरीबारे सरसल्लाहमै थियो, अब अधुरै रहने भयो’, खत्रीले सुनाए। 

उनीहरूबीच बुधबार बागलुङको भीमपोखरामा हुने माघे सङ्क्रान्ति मेलामा एउटै मञ्च साझा गर्ने तय भइसकेको थियो। खत्रीकै समन्वयमा नीरा भीमपोखराको मेलामा जाँदै थिइन्। स्थानीय प्रगतिशील युवा क्लबले उनीहरूलाई आमन्त्रण गरेको थियो। 

गायिका नीराको निधनले मर्माहत बनेका गायक खत्रीले भीमापोखराको उक्त मेलामा आफू पनि नजाने निर्णय गरेका छन्। ‘बैनीको दुःखद् घटनापछि मैले पनि त्यो मञ्चमा उक्लिएर एक्लै गीत नगाउने निर्णय गरेँ’, गायक खत्रीले भने, ‘मैले नै सिफारिस गरेर नीरा बैनी भीमापोखरा आउने योजना बनेको थियो।’ 

आइतबार माघे सङ्क्रान्तिका अवसरमा पोखरामा हुने छन्त्याल समुदायको कार्यक्रममा भाग लिएर गायिका छन्त्याल मङ्गलबार म्याग्दी महोत्सवमा पुग्ने समयतालिका थियो। त्यहीँबाट बागलुङको भीमापोखरा जाने कार्यक्रम थियो। 

‘बैनी नीरासँग मञ्चीय कार्यक्रममा दर्शक, स्रोतालाई मनोरञ्जन दिलाउने कला र शैली अनौठो थियो’, गायक खत्रीले भने, ‘त्यही कारण मेला, महोत्सवमा उहाँको व्यस्तता बढ्दो थियो, धेरैतिर बोलाउँथे।’ 

प्रत्यक्ष दोहोरीको प्रवर्द्धन गरिरहेको ‘सारङ्गी संसार’ युट्युब च्यानलका सञ्चालक ताराकान्त विकले गायिका नीरालाई ऊर्जाशील कलाकारका रूपमा स्मरण गरे। ‘एउटा आशलाग्दो प्रतिभा हुनुहुन्थ्यो, हँसिलो, चञ्चल, ऊर्जा पनि उस्तै’, विकले भने, ‘मञ्चीय कार्यक्रममा दर्शक/स्रोतालाई अडाइरहन सक्ने क्षमता उहाँमा थियो।’ 

‘सारङ्गी संसार’का छवटा भागमा गायिका नीरा मुख्य भूमिकामा प्रस्तुत भएकी थिइन्। प्रत्यक्ष दोहोरीमा खरो उत्रन सक्ने उनको आफ्नै युट्युब च्यानल पनि छ। चर्चित गायकहरूसँगको उनको दोहोरी घम्साघम्सीले युट्युबमा उल्लेख्य दर्शक पाएको छ। 

तीज गीत, पञ्चेबाजालगायत गीत सार्वजनिक गरेकी नीरा प्रत्यक्ष दोहोरीबाट अझ बढी चिनिएको विकले बताए। ‘प्रत्यक्ष दोहोरीमा गज्जबले जम्न सक्नुहुन्थ्यो, मौलिक शब्द र बागलुङे लवज उहाँको गायनमा झल्कन्थ्यो’, विकले भने, ‘अब त्यो सम्झनामा मात्र रहने भयो, एल्बम र युट्युबमा मात्र उहाँका गीत बाँकी रहे।’

बडिगाड–८ का टीका पाइजाले छन्त्यालले सानैदेखि रुचि लिएर गायन क्षेत्रमा लागेको बताइन्। ‘पछिल्लोपटक गत मङ्सिरमा बडिगाडको न्वागी मेलामा आउनुभएको थियो, जिल्लामा हुने मेला, महोत्सवमा आइरहनुहुन्थ्यो’, पाइजाले भनिन्, ‘दुई/तीन वर्षयता उहाँ लोकदोहारीमा बढी चिनिन थाल्नुभएको थियो, युट्युबमा पनि उहाँका गीत चलेका थिए।’ 

सङ्गीत क्षेत्रमा भविष्य खोज्दै छन्त्याल चार वर्षअघि काठमाडौँ छिरेकी थिइन्। गायनमा सफल हुँदै गएपछि उनका माग पनि बढ्दै गएको थियो। शनिबार मात्र काठमाडौँमा आयोजित कार्यक्रममा उनले प्रस्तुति दिभएकी थिइन्। सोही दिन टुँडिखेलामा सिसाखानीको ऐतिहासिक घाटु नाच प्रदर्शनका लागि पनि उनी सक्रिय भएर लागेकी थिइन्। 

पोखरा उड्नुअघि नीराले सामाजिक सञ्जालमार्फत माघे सङ्क्रान्ति पर्वको शुभकामना दिएकी थिइन्। फेसबुकमा अरुले फर्काएका शुभकामनाका सन्देशसमेत हेर्न नपाउँदै छन्त्याल सेतीखोँचमा अस्ताएकी हुन्। बडिगाड–८ का वडाध्यक्ष खडक पुनले गायिका नीराको अप्रत्याशित निधनले आफूहरू स्तब्ध बनेको बताए। 

‘सङ्गीत क्षेत्रमा सङ्घर्षशील, आफ्नै प्रतिभा र क्षमताले स्थापित गाउँकी चेलीलाई गुमाउनुपर्दा गहिरो पीडाबोध भएको छ’, उनले भने, ‘विद्यालयमा पढ्दादेखि नै नाच्नेगाउनेमा उहाँको बढी रुचि थियो, गाउँमा हुने वैशाखे पूर्णिमालगायत मेला, कार्यक्रममा सानैदेखि गीत गाउनुहुन्थ्यो।’

छन्त्यालले विद्यालय तहको पढाइ गाउँकै सिसाखानी माविमा पूरा गरेकी थिइन्। बुवा मनबहादुर र आमा लीला छन्त्यालका सन्तानका रुपमा जन्मिएकी नीराको निधनपछि जन्मगाउँ सिसाखानी पनि शोकमा डुबेको छ। उनको शव बुझ्न वडाध्यक्षसहित आफन्त पोखरा झरेका छन्। रासस