प्रगतिशील गायक जेबी टुहुरे बिरामी भएका छन्। अहिले उनी बल्खुस्थित बयोधा अस्पतालको सीसीयू कक्षमा उपचाररत छन्।
उपचारमा संलग्न चिकित्सकका अनुसार उनलाई ‘स्ट्रोक’ भएको हो।
परिवारजनका अनुसार ७६ वर्षीय टुहुरे हिजो (मंगलबार) दिउँसो घर (कलंकी) मै अचानक बेहोस भएर लडेपछि उनलाई अस्पताल भर्ना गरिएको हो।
डेढ सयभन्दा बढी गीत गाएका टुहुरेकाे सबैभन्दा चर्चित गीत हो– ‘आमा दिदीबहिनी हो, कति बस्छौ दासी भई, सुखको सधैं प्यासी बनेर’।
यस्तै ‘बसाइँ हिँड्नको ताँतीले बस्नेको मन रुँद छ, लाखौंको लागि उजाड छ यो देश मुठ्ठीभरलाई त स्वर्ग छ’ बोलको गीत पनि निकै चर्चित छ।
२०२४ सालदेखि सांगीतिक क्षेत्रमा प्रवेश गरेका टुहुरेको वास्तविक नाम जुठबहादुर खड्गी हो।
सुनसरीको धरान घर भएका उनी दोस्रो संविधान सभामा तत्कालीन एकीकृत नेकपा माओवादीबाट समानुपातिक सभासदसमेत बनेका थिए।
उनको नाममा जेबी टुहुरे फाउन्डेसनसमेत स्थापना गरिएको छ। २०७५ सालमा स्थापित फाउन्डेसनको अध्यक्ष उनकी छोरी निर्भीका छन्।
Shares
प्रतिक्रिया