श्रम, रोजगार तथा सामाजिक सुरक्षामन्त्री डोलप्रसाद अर्यालले हाल कुनै पनि व्यक्ति रुस जान श्रम स्वीकृतिको व्यवस्था नरहेको स्पष्ट पारेका छन्।
राष्ट्रिय स्वतन्त्र पार्टी (रास्वपा)ले काठमाडौँको आँखामा कर्णाली विषय कार्यक्रममा उनले हाल रुस जान व्यक्तिगत श्रम स्वीकृतिको व्यवस्था बन्द नै रहेको र खुला नगरिएको स्पष्ट पारेका हुन्।
मन्त्री अर्यालले वैदेशिक रोजगार व्यवसायीले रुसमा युद्धग्रस्त क्षेत्र होइन भन्ने स्पष्ट पारेको र जोखिम छैन भन्ने मागलाई स्वीकृति दिने अघिल्लो मन्त्रीको पालामा भएको निर्णयका सन्दर्भमा आफूहरू पुनःमूल्यांकनका लागि अध्ययनका क्रममा रहेको जानकारी गराए।
सरकार अविच्छिन्न उत्तराधिकारी हुने र निरन्तर चलिरहने विषयका सन्दर्भमा भने आफू सजग रहेको उनको भनाइ थियो।
मन्त्री अर्यालले श्रम स्वीकृति लिएर गएका नेपालीको उद्धारका हकमा आफ्नो मन्त्रालयले जिम्मेवार हुने र श्रम स्वीकृति नलिई गएका नागरिकको हकमा परराष्ट्र मन्त्रालयले समन्वय गर्नुपर्ने धारणा पनि राखे।
कार्यक्रममा रास्वपाका उपसभापति एवं सांसद डा स्वर्णिम वाग्लेले राजनीतिक संगठन निर्माणसँगै मुलुकको समृद्धिका लागि समेत पार्टीले ध्यान दिने बताए।
उनले २०८४ मा पार्टी सभापति रवि लामिछानेको नेतृत्वमा रास्वापा निर्वाचनमा होमिनेमा स्पष्ट रहेको उल्लेख पनि गरे। रासस
Shares
प्रतिक्रिया