युनिकोड
वैदेशिक रोजगारबाट फर्किएका दाङका युवा पशुपालन पेशामा आबद्ध हुँदै गएका छन्। यहाँका युवाहरू भैँसी, कुखुरा, बाख्रालगायत पेसा, व्यवसायमा सम्लग्न भएका हुन् । बाहिरी देशमा भनेजस्तो तलब र काम नपाइने जनाउँ युवाहरू पछिल्लो समय पशुपालन व्यवसायबाट मनग्य आम्दानी गरिरहेका छन्।
दाङमा मामा भान्जा मिलेर विगत ३ वर्षदेखि व्यावसायिक रूपमा बाख्रापालन व्यवसाय गर्दै आएका छन् । घोराही उपमहानगरपालिका–१२ रमनामा बुद्ध बाख्रा फार्ममार्फत व्यवसायमा जोडिभएका ३४ वर्षीय भान्जा जनक बुढा र उनका मामा ५४ वर्षीय मनबहादुर बुढा बाख्रापालन व्यवसायबाट सन्तृष्ट भएका छन् । जनक ५ वर्ष र मनबहादुर २५ वर्ष रोजगारका लागि साउदीमा जीवन व्यतित गरेका थिए।
किसान जनक विदेशबाट आएर बाख्रापालन व्यवसाय सुुरु गरेको बताउछन् । उनले भने, ‘वार्षिक रूपमा बाख्राको बिक्रीबाट १ वर्षमा १० लाख आम्दानी हुन्छ।’ तर बाख्राको दानापानी, औषधिलगायतमा खर्च हुने हुँदा त्यति धेरै बचत गर्न सकिएको छैन । ‘अरुको देशमा बसेर सोचेजस्तो कमाई गर्न नसकिएको हुँदा अहिले आफ्नै देशमा बाख्रापालन व्यवसायबाट सन्तृष्ट छौँ, भोलिका दिनमा व्यवसायलाई बढाउँदै लैजाने उनको सोच छ।
फार्ममा हाल ७५ वटा बोयर, खरी र लोकल जातका बाख्रा छन्। २ बिघा जग्गा भाडामा लिएर बाख्रापालन गर्दै आएका अर्का किसान मनबहादुर बुढा बताउछन्। बाबुबाजेले गरेको पेसा पशुपालन भएकाले यही नै उत्तम व्यवसाय लागेको उनको भनाइ छ।
घाँसका लागि आफैँ छर्ने गरेको हुँदा घाँसको समस्या नहुने उनी बताउछन्। गत वर्ष मात्रै ५४ वटा बाख्रा रोग लागेर मरेका कारण २ लाख ५० बढी घाटा भएको उनले सुनाए। यसैलाई निरन्तरता दिँदै जाँदा सफल हुँदै जानेमा उनीहरू आशावादी छन्। उनीहरूले एउटा खसीलाई ५४ हजारसम्म बिक्री गर्ने गरेका छन्। फार्ममा धेरै काम भएका बेला घरपरिवारले पनि सहयोग गर्ने भएको हुँदा अन्य कामदारको आवश्यक नपर्ने गरेको मनबहादुर बताउछन् । सुरुमा ८ वटा बाख्राबाट सुरु गरेको व्यवसाय हाल भने बढ्दै गएको छ।
पछिल्लो समय जिल्लामा व्यावसायिक रूपमा नै बाख्रापालन गर्ने युवाको संख्या बढ्दो छ । बाख्राको बजार मूल्य राम्रो भएपछि किसान व्यवसायमा आकर्षित भएका हुन्। किसानले घरघरमा थोरै भए पनि बाख्रा पालेर सामान्य घर खर्च चलाउने गरेका छन् । विशेषगरी गाउँघरमा किसानले घरमा २४ वटा माउबाख्रा पालेर कमाएको रकम छोराछोरीको पढाइ खर्च, घर खर्च र केही रकम बचत गर्न थालेका छन्।
जसले घर खर्च बाख्रापालन व्यवसायले टर्ने गरेको किसान बताउँछन्। बाख्रापालन व्यवसायमा बजारीकरणको समस्या नहुने भएकाले यसबाट राम्रो आम्दानी गर्न सकिने किसानको भनाइ छ। रासस
प्रतिक्रिया