चीनबाट स्वास्थ्य सामग्री बोकेर आएको निगमको जहाज ५० मिनेटदेखि आकाशमै होल्ड

चार सय अक्सिजन सिलिन्डर बोकेर आएको नेपाल वायुसेवा निगमको वाइडबडी ५० मिनेटदेखि नेपाली आकाशमै होल्डमा रहेको छ।

साेमबार राति चीनको बेइजिङमा गएको वाइडबडी २ः३५ मा त्रिभुवन विमानस्थल अवतरण गर्नुपर्ने भए पनि ढिलाइ भइरहेको छ।

त्रिभुवन विमानस्थलको टीडीओ कार्यालयले भने विमानस्थलमा कुनै समस्या नभई जहाजको आफ्नै आवश्यकताअनुसार होल्डमा बसेको जनाएको छ।

करिब ३ बजे नेपाली आकाशमा प्रवेश गरेको जहाज निजगढ क्षेत्रमा छ पटक घुमिसकेको छ।

नेपाल वायुसेवा निगमका अनुसार ४ सय थान अक्सिजन सिलिन्डर, १० थान भेन्टिलेटर र १७३ थान अक्सिजन कन्सन्ट्रेटर जहाजमार्फत ल्याइएको छ।

चीन सरकारले नेपालमा अक्सिजन सिलिन्डर अभाव भएसँगै २० हजार सिलिन्डर अनुदानमा दिने बताएको थियो। जसअनुसार पहिलो लटमा ४ सय सिलिन्डर ल्याइएको हो।

सरकारले करिब २ हजार सिलिन्डर हवाइमार्गबाट र बाँकी स्थलमार्गबाट ल्याउने जनाएको छ।