सीजी सिमेन्टले आफ्नो क्लिंकर उत्पादनसहित उद्योग क्षमता विस्तार गर्ने भएको छ। उसले पाल्पामा रहेको क्लिंकर उत्पादन क्षमता वृद्धि गर्न दश बैंकसँग सहकार्य गर्ने जनाएको छ।
उसले ती बैंकबाट क्लिंकर उत्पादनमा २ अर्ब ३७ करोड ८० लाख रुपैयाँसहित ९ अर्ब ६ करोड ३० लाख लगानी गर्न सम्झौता गरेको छ। सीजीले आफ्नो क्लिंकर उत्पादन क्षमता दैनिक २ हजार ९ सय ५० पुर्याउने जनाएको छ।
सीजीले सानिमा बैंकको अगुवाइ र नेपाल इन्फ्रास्ट्रक्चर बैंकको सहअगुवाइमा ग्लोबल आईएमई, कुमारी बैंक, सनराइज बैंक, प्रभु बैंक, नेपाल बैंक, सेञ्चुरी बैंक, नेपालक्रेडिट एन्ड कमर्स बैंक र नेपाल एसबीआई बैंकसँग ९ अर्ब ६ करोड ३० लाख लगानी गर्न बैंकहरुबीच पूरक सहवित्तीयकरण सम्झौता भएको छ।
सानिमा बैंकका प्रमुख कार्यकारी अधिकृत भुवनकुमार दाहाल र सह–अगुवा बैंकका तर्फबाट नेपाल इन्फ्रास्ट्रक्चर बैंकका नायब प्रमुख कार्यकारी अधिकृत भुपेन्द्र पाण्डेलगायतको उपस्थितिमा सिजी सिमेन्टका तर्फबाट अध्यक्ष निर्वाणकुमार चौधरी र अगुवा बैंकका तर्फबाट प्रमुख परियोजना लगानी अधिकृत सरोज गुरागाईंले हस्ताक्षर गरेका छन्।
प्रतिक्रिया