युनिकोड
नेपाल उद्योग वाणिज्य महासंघको ६०औँ वार्षिक साधारणसभा जारी छ। यसअन्तर्गत आज व्यवसायीहरुले महासंघमा नयाँ पदाधिकारी चुन्दै छन्।
व्यवसायीहरुको चुनावी चहलपहल नेपाल प्रज्ञा प्रतिष्ठानमा राम्रै देखिएको छ। प्लेकार्ड बोकेर आफूले समर्थन गरेका पदाधिकारी उम्मेदवारलाई जिताउन व्यवसायीहरु लागिपरेका छन्।
अध्यक्षमा अन्जन श्रेष्ठ निश्चित भइसकेकाले अन्य पदाधिकारीमा व्यवसायीहरुबीच चुनावी प्रतिस्पर्धा भएको हो। करिब दुई हजार व्यवसायीले महासंघको नयाँ कार्यसमिति चयन गर्नेछन्। महासंघको नेतृत्वको लागि चार उपाध्यक्ष र बाँकी सदस्य पदमा निर्वाचन हुँदै छ। त्यसमध्ये, जिल्ला नगरबाट २, एसोसिएटबाट १, वस्तुगत १ उपाध्यक्ष हुनेछन् भने बाँकी सदस्य पदका लागि निर्वाचन भइरहेको छ।
महासंघको नेतृत्व चयनका लागि २ हजारभन्दा बढी उद्योगी व्यवसायीले मतदान गर्ने बताइएको छ। महासंघको निर्वाचनमा व्यवसायीहरु हेमराज ढकाल र शिवप्रसाद घिमिरे प्यानल नै बनाएर चुनावी मैदानमा छन्। महासंघमा चन्द्रप्रसाद ढकालपछि अञ्जन श्रेष्ठ स्वतः अध्यक्ष हुँदै छन्। उनी अहिले महासंघमा वरिष्ठ उपाध्यक्ष छन।
महासंघको निर्वाचनमा भने अध्यक्ष चन्द्रप्रसाद ढकालले हेमराज ढकाल र वरिष्ठ उपाध्यक्ष अञ्जन श्रेष्ठले शिवप्रसाद घिमिरेलाई समर्थन गरिरहेका छन्। हेमराज ढकालको टिमबाट एसोसिएट उपाध्यक्षमा ज्योत्सना श्रेष्ठ, उमेश डालमिया चुनवाी मैदानमा छन्। त्यसैगरी, कल्पना गैरे जिल्ला नगर उपाध्यक्ष तथा कमला श्रेष्ठ महिला उपाध्यक्षमा चुनावी अभियानमा छिन्।
घिमिरे समूहले भने कार्यसमिति चयनपछि मात्रै वरिष्ठ उपाध्यक्षको उम्मेद्वारी घोषणा गर्ने तयारी गरेको छ। घिमिरेको समूहमा एसोसिएट उपाध्यक्षमा प्रबलजंग पाण्डे चुनावी मैदानमा छन्। जिल्ला नगरतर्फको उपाध्यक्षमा दिलसुन्दर श्रेष्ठ र कृष्णप्रसाद शर्माले उम्मेदवारी दिएका छन्।
तस्बिरमा हेर्नुहोस्
प्रतिक्रिया