युनिकोड
सेयरबजारमा बिहीबार सुधार देखिएको छ।
बुधबारको करेक्सनपछि साताको अन्तिम कारोबार दिन नेप्से ९.२३ अंकले बढेको हो।
योसँगै बजार २७१४.६१ विन्दुमा पुगेको छ। यस दिन ९ अर्ब ७ करोडको कारोबार भएको छ। कुल १ करोड ९० लाख कित्ता बिक्रीपछि यो परिमाणको कारोबार भएको नेपाल स्टक एक्सचेन्जले जनाएको छ।
बिहीबार १६२ वटा सेयरको मूल्य बढ्दा ८८ वटाको मूल्य घटेको र १० वटाको अघिल्लो मूल्यमै कारोबार भएको छ।
बढेकामध्ये एसवाई प्यानल, श्रीनगर एग्रिटेक र त्रिशूली जलविद्युत् कम्पनीको सेयरमा सर्किट ब्रेक हुँदा लगानीकर्ताले क्रमशः १५५.५०, १२७.१० र ३८.७० रुपैयाँ प्रतिकित्ता आम्दानी गरेका छन्। यसबाहेक कर्पोरेट डेभलपमेन्ट बैंकको ९.९९ र एक्सेल डेभलपमेन्ट बैंकको ९.८७ प्रतिशतले बढेको छ।
घटेकामध्ये कालिका पावर कम्पनी ६.२५ प्रतिशतले ओरालो लाग्दा सानिमा ग्रोथ फन्ड २.८०, फर्स्ट माइक्रोफाइनान्स लघुवित्त २.२६, मैलुङ खोला जलविद्युत् २.२६ र गोर्खाज फाइनान्स २.२४ प्रतिशतले ओरालो लागेका छन्।
आज आखु खोला जलविद्युत्को ४० करोडको सर्वाधिक खरिदबिक्री हुँदा मञ्जुश्री फाइनान्स ३५ करोड, एसवाई प्यानल ३२ करोड, बन्दीपुर केबलकार २८ करोड र श्रीनगर एग्रिटेकको २४ करोडको सेयर कारोबार भएको नेप्सेले जनाएको छ।
आज कुल ९४ हजार १ सय ७४ पटक सेयर किनबेच भएका थिए।
बिहीबारको कारोबारमा वाणिज्य बैंक, सामूहिक लगानी कोष र व्यापार समूह घट्दा बाँकी सबै बढेको नेप्सेले जनाएको छ।
प्रतिक्रिया