युनिकोड
गत आर्थिक वर्षमा नेपाल टेलिकमको कुल आय, सञ्चालन आय, खुद नाफा, करअघिको नाफा घटेको छ।
टेलिकमले गत आवको वित्तीय विवरणअनुसार कुल आय २ अर्ब ८० करोड ६५ लाख (६.३२ प्रतिशत)ले घटेको हो। अघिल्लो आवमा ४४ अर्ब ४२ करोड ३६ लाख १८ हजार कुल आम्दानी गरेको टेलिकमले गत आवमा ४१ अर्ब ६१ करोड ७१ लाख १७ हजार रुपैयाँ कमाएको हो।
त्यसैगरी टेलिकमको कुल सञ्चालन आय पनि १ अर्ब ८१ करोड ३ लाख १५ हजारले घटेको छ। अघिल्लो आवमा ३६ अर्ब २७ करोड १४ लाख ५० हजार कुल सञ्चालन आम्दानी गरेको टेलिकमले गत आवमा ३४ अर्ब ४६ करोड ११ लाख ३५ हजार आम्दानी गरेको छ।
त्यसैगरी टेलिकमको खुद मुनाफामा समेत १६.४४ प्रतिशतले कमी आएको छ। टेलिकमका अनुसार अघिल्लो आवमा ७ अर्ब ९२ करोड १ लाख ५५ हजारको तुलनामा गत आवमा टेलिकमले ६ अर्ब ६१ करोड ७७ लाख ७६ हजार मात्रै मुनाफा गरेको छ।
टेलिकमको करअघिको मुनाफामा ३.९१ प्रतिशतले कमी आएको छ। अघिल्लो आवमा ११ अर्ब ८४ करोड २५ लाख ६२ हजार यस्तो मुनाफा गरेको कम्पनीले गत आवमा ११ अर्ब ३७ करोड ९८ लाख ४ हजार रुपैयाँ मुनाफा गरेको छ।
टेलिकमको प्रतिसेयर आम्दानी ३६ रुपैयाँ ७७ पैसा रहेको छ।
आय र नाफामा कमी आउनुमा ओटीटी सेवाको बढ्दो प्रयोग, बढी लागत, कम दरमा ब्यान्डविथ खरिद, जीएसएम अनुमतिपत्रको तेस्रो नवीकरणमा २० अर्ब भुक्तानीले प्रभाव पारेको टेलिकमले जनाएको छ।
प्रतिक्रिया