काठमाडौँबाट हेटौँडा आउँदै गरेको सुमो दुर्घटना: ९ जना घाइते, ७ को अवस्था गम्भीर

मकवानपुरको जुरीखेतमा सुमो दुर्घटना हुँदा नौ जना घाइते भएका छन्।

आइतबार साँझ ५:२० बजेतिरको समयमा भीमफेदी गाउँपालिका–६ जुरीखेतस्थित भीमफेदी–कुलेखानी–काठमाडौँ सडक खण्डमा सुमो गाडी दुर्घटना हुँदा ९ जना घाइते भएका हुन्।

काठमाडौँबाट हेटौँडातर्फ आउँदै गरेको ना १ ज १७७८ नम्बरको सुमो अनियन्त्रित भई सडकबाट करिब १ सय मिटर तल खोल्सामा खसेको मकवानपुर प्रहरीले जनाएको छ। दुर्घटनाको खबर प्राप्त हुनासाथ इलाका प्रहरी कार्यालय भीमफेदीबाट प्रहरी टोली घटनास्थलमा पुगेको थियो।

सुमोमा सवार ९ जनालाई उद्धार गरी उपचारका लागि हेटौँडातर्फ पठाइएको छ। घाइतेमध्ये ६ जना पुरुष, १ जना महिला, १ बालक र १ बालिका रहेका छन्। प्रहरीका अनुसार ७ जनाको अवस्था गम्भीर तथा २ जना बालबालिकाको अवस्था मध्यम रहेको छ।

दुर्घटनाग्रस्त सुमो गाडी हाल घटनास्थलमै रहेको छ। दुर्घटनाको कारणबारे थप अनुसन्धान भइरहेको प्रहरीले जनाएको छ। घाइतेहरूको पहिचान खुल्न बाँकी रहेको प्रहरीले जनाएको छ।