काठमाडौँको न्यूनतम तापक्रम ९ दिनदेखि लगातार घट्दो, आज कतिमा झर्‍यो?

काठमाडौँ उपत्यकाको न्यूनतम तापक्रम ९ दिनदेखि लगातार घटिरहेको छ। 

यस क्रममा आज (असोज २८, मंगलबार) उपत्यकाको न्यूनतम तापक्रम १२.५ डिग्री सेल्सियसमा झरेको मौसम पूर्वानुमान महाशाखाका मौसमविद्ले नेपालखबरलाई जानकारी दिएका छन्।

‘यो अहिले बिहान ५:४५ बजेको मापन हो’, ती मौसमविद्ले भने, ‘आजको आधिकारिक न्यूनतम तापक्रम भने अहिले बिहान ८:४५ बजे पुन: मापन हुन्छ। त्यतिबेला थोरै अझ घट्न पनि सक्छ। अथवा यत्ति नै रहन पनि सक्छ। तर यसभन्दा बढ्ने सम्भावना हुँदैन।’  

९ दिनअघि असोज २० गते काठमाडौँ उपत्यकाको न्यूनतम तापक्रम १८.१ डिग्री सेल्सियस थियो भने २१ गते घटेर १७.८ डिग्री सेल्सियसमा झरेको थियो। असोज २२ गते एकदिन स्थिर रहेको उपत्यकाको न्यूनतम तापक्रम त्यसयता लगातार घट्दै असोज २३ मा १७.४,  असोज २४ मा १५.६, असोज २५ मा १४.५, असोज २६ मा १३.३, असोज २७ मा १३ डिग्री सेल्सियसमा झरेको थियो। 

त्यसबाट पनि घटेर आज असोज २८ गते १२.५ डिग्री सेल्सियसमा ओर्लिएको हो।

मौसम महाशाखाले हरेक दिन काठमाडौँसहित देशका विभिन्न स्थानको न्यूनतम र अधिकतम दुईथरी तापक्रम मापन गर्छ। मौसमविद्का अनुसार न्यूनतम बिहान ८:४५ बजे मापन हुन्छ भने अधिकतम साँझ ५:४५ बजे मापन गरिन्छ। 

आजको मौसम

मौमस पूर्वानुमान महाशाखाका अनुासार आज दिउँसो कोसी प्रदेश, गण्डकी प्रदेश र सुदूरपश्चिम प्रदेशको पहाड भेगमा आंशिक बदली रही देशका बाँकी स्थानमा मुख्यतया सफा रहने छ। कोसी प्रदेशको पहाड भूभागका एक-दुई स्थानमा हल्का वर्षाको सम्भावना छ।

राति भने देशभर मौसम मुख्यतया सफा रहने मौसम महाशाखाले जनाउको छ।

मौसमविद्का अनुसार हाल देशभर कुनै उल्लेखनीय मौसम प्रणालीको प्रभाव छैन।