युनिकोड
पश्चिमी वायुको प्रभावले आज बेलुका काठमाडौँ उपत्यकामा पनि हल्का वर्षा भएको छ। वर्षा भएसँगै चिसो बढेको महसुस भएको छ।
मौसम पूर्वानुमान महाशाखाका मौसमविद् मीनकुमार अर्यालले काठमाडौँ उपत्यकामा केही बेर छिटपुट वर्षा भएको र अहिले धेरै स्थानमा रोकिइसकेको बताए।
‘केही बेर वर्षा भएको थियो, अहिले कतै कतै छिटपुट पर्दै होला कि नत्र लगभग वर्षा रोकिइसकेको छ’, उनले भने।
आज राति काठमाडौँ उपत्यकाको मौसम बदली रहने भए पनि अब वर्षाको सम्भावना खासै नरहेको मौसमविद् अर्यालयको भनाइ छ।
‘यो खासै बलियो सिस्टम होइन’, उनले भने, ‘त्यसैले अब वर्षाको सम्भावना देखिन्न।’
दिउँसो मौसम बदली (आकाशमा बादल) भएका कारण आज काठमाडौँ उपत्यकाको अधिकतम तापक्रम पनि घटेको छ।
मौसम महाशाखाका अनुसार आज उपत्यकाको अधिकतम तापक्रम १७.२ डिग्री सेल्सियसमा झरेको हो। हिजो सोमबार यो तापक्रम १७.६ डिग्री सेल्सियस थियो।
आज काठमाडौँ उपत्यकाको न्यूनतम तापक्रम भने ४.४ डिग्री सेल्सियस छ। हिजो ४.३ डिग्री सेल्सियस थियो।
प्रतिक्रिया