पृथ्वी राजमार्गअन्तर्गत चितवनको इच्छाकामना-३ फिस्लिङ बजारनजिकै आज (शुक्रबार) बिहान भएको सवारी दुर्घटनामा परी घाइते भएका कार चालकको मृत्यु भएको छ।
कार चालक कास्कीको पोखरा महानगरपालिका–५ का ३५ वर्षीय समीर ओझाको उपचारका क्रममा पुरानो मेडिकल कलेज भरतपुरमा मृत्यु भएको जिल्ला प्रहरी कार्यालयले जनाएको छ।
जिल्ला प्रहरी कार्यालय चितवनमा प्रहरी नायब निरीक्षक एवं प्रहरी प्रवक्ता रवीन्द्र श्रेष्ठका अनुसार घाइतेमध्ये काठमाडौँको टोखा नगरपालिका–६ का २२ वर्षीय शेखर मिश्र र ललितपुर महानगरपालिका-२४ बस्ने २१ वर्षीय सिर्जन ओझाको अवस्था चिन्ताजनक छ।
बाँकेको नेपालगन्जबाट काठमाडौँतर्फ गइरहेको भे १ ख ४०६० नम्बरको बस र काठमाडौँबाट मुग्लिनतर्फ आइरहेको बागमती प्रदेश ०२–०२९ च ३७२० नम्बरको कार एकापसमा ठोकिएका हुन्। दुर्घटनामा १३ जना घाइते भएका छन्।
चार जना भने उपचारपश्चात् घर फर्किएको प्रहरीले जनाएको छ।
कारसँग ठोकिएपछि बस त्रिशूली नदी किनारमा खसेको थियो।
Shares
प्रतिक्रिया