मकवानपुरको मकवानपुरगढी गाउँपालिकाले रैथाने बालीलाई प्रोत्साहन गर्दै कोदो, फापर र जुनेलोको मूल्य निर्धारण गरेपछि खरिद संकलन सुरु गरेको छ।
गाउँपालिकाको वडा नम्बर ८ स्थित बुढीचौरस्थित एकता स्वाबलम्बन कृषि सहकारी संस्था लिमिटेडले आइतबारबाट कृषकहरूको उत्पादन मिठे फापर र तिते फापर खरिद गरि संकलन गर्न सुरुवात गरेको हो।
गाउँपालिकाले प्रति केजी एक सय मूल्य तोकिएको फापरमा सहकारी संस्थाले १ सय १० मा खरिद गरिएको हो। जसमा अनुदान रकमसमेत थप गरि प्रति केजी १ सय १६ रुपैयाँको दरले कृषकहरुबाट फापर खरिद गरेको गाउँपालिका कृषि शाखा प्रमुख चन्द्रकान्त चौधरीले जानकारी दिए।
आइतबारबाट खरिद गर्न सुरु गरिएकोमा पहिलो दिन २१ जना कृषकहरूबाट २ हजार १ सय ७४ केजी फापर खरिद भएको बताइएको छ।
गत वर्ष कृषकहरुले प्रतिकिलो ९० रुपैयाँमा बिक्री गरेको फापर यस वर्ष गाउँपालिकाको अनुदानसमेत थप गरि प्रतिकिलो १ सय १६ रुपैयाँ पाएकोमा स्थानीय खुसी भएका छन्।
Shares
प्रतिक्रिया