विश्वकपमा आजदेखि दोस्रो चरणका खेल, यी टिमको हुँदै छ भिडन्त

विश्वकप फुटबलमा आजदेखि दोस्रो चरणका खेल हुँदै छन्। यसअघि पहिलो चरणमा सबै टोलीले एक/एक खेल खेलेका छन्। सबै टोलीले ३/३ खेल खेलेपछि अन्तिम १६ मा जाने देशको टुंगो लाग्ने छ। 

अन्तिम १६ बाट नकआउट चरणका खेल सुरु हुनेछन्। पहिलो चरणमा अर्जेन्टिना, जर्मनीजस्ता पूर्व विश्वविजेता हारेका छन्। अब दोस्रो चरणका खेलपछि धेरै समूहको आगामी यात्राको टुंगो लाग्ने छ। 

दोस्रो चरणमा भेट हुँदै छन् यी टोली

मंसिर ९ गते दोस्रो चरणको पहिलो खेलमा वेल्स र इरान दिउँसो ३ः४५ मा भेट हुँदा आयोजक राष्ट्र कतारले सेनेगलसँग नेपाली समय अनुसार ६ः४५ बजे खेल्नेछ। 

त्यही बेलुका ९ः४५ बजे  नेदरल्यान्ड्स  इक्विडर भिड्दा मध्यरात १२ः४५ बजे इङ्ल्यान्ड र अमेरिका आमनेसामने हुनेछन्।

मंसिर १०

दिउँसो ३ः४५ बजे ट्युनिसिया र अष्ट्रेलिया भिड्दा, रोवर्ट लेवान्डोस्कीको टिम पोल्याण्डले साँझ ६ः४५ मा साउदी अरेवियाको सामना गर्नेछ।
पहिलो खेल मध्यरातमा खेल्ने फ्रान्सको दोश्रो खेल भने बेलुका ९ः४५ बजे सुरु हुनेछ। यो समयमा फ्रान्स र डेनमार्क भिड्नेछन्। 

तर लियोनल मेस्सीको खेल हेर्न भने मध्यरातसम्म कुर्नु पर्नेछ। समूह चरणको दोश्रो खेलमा अर्जेन्टिना र मेक्सीको राति १२ः४५ बजे भिड्नेछन्। 

मंसिर ११

एसियन पावरहाउस जापान र कोष्टारिकाबीचको खेल दिउँसो ३ः४५ बजे सुरु हुँदा त्यसै साँझ ६ः४५ बजे बेल्जियम र मोरक्को भेट हुनेछन्।बेलुका ९ः४५ बजे क्रोयसियाले क्यानडासँग खेल्दा मध्यरातको खेल प्रतिक्षा लायक हुनेछ। त्यो रात दुई ठूला टिम स्पेन र जर्मनी १२ः४५ मा आमनेसामने हुनेछन्।

मंसिर १२ 

दिउँसो ३ः४५ मा क्यामरुनले सर्वियासँग खेल्दा ६ः४५ मा दक्षिण कोरिया र घाना भिड्नेछन्। ९ः४५ मा ब्राजिलले स्वीजरल्याण्डसँग खेल्दा त्यो मध्यरात पोर्चुगल र उरुग्वे भिड्ने छन्। 

मंसिर १३ गतेबाट समूहका अन्तिम चरणका खेल सुरु हुनेछन्। अन्तिम चरणमा भने एउटै समूहमा दुई खेल हुनेछन्। एउटा समूहका सबै टोली एकसाथ भिड्नेछन्।