युनिकोड
प्रदेश २ प्रधानमन्त्री कप महिला राष्ट्रिय क्रिकेट प्रतियोगितामा सान्त्वना जित निकाल्दै घर फर्किएको छ।
दाङको लमहीमा आज भएको खेलमा प्रदेश २ ले कर्णाली प्रदेशलाई १ सय ४३ रनको फराकिलो अन्तरले पाखा लगाएको हो। समूह एमा रहेको कर्णाली प्रदेशले भने जितको खातै खोल्न सकेन।
प्रदेश २ ले दिएको १ सय ६६ रनको लक्ष्य पछ्याएको कर्णाली प्रदेशले निर्धारित २० ओभरमा ९ विकेट गुमाएर २२ रन मात्र जोड्न सक्यो। कर्णालीका कुनै पनि ब्याट्सवुमनले दोहोरो अंकको स्कोर छुन सकेनन्। ६ जना ब्याट्स वुमन शून्य रनमै पवेलियन फर्किए। तिर्सना बुढाथोकीले जोडेको ७ रन नै कर्णालीका लागि सर्वाधिक रह्यो।
कर्णालीलाई सस्तैमा समेट्न प्रदेश २ की सरस्वती कुमारी र कविता गौतमले समान ३ विकेट झारे। सन्तोषी चौधरी र आरती चौधरीले समान १ विकेट लिए।
त्यसअघि टस जितेर पहिले ब्याटिङ गरेको प्रदेश २ ले निर्धारित ओभरमा ३ विकेट गुमाउँदै १ सय ६५ रनको योगफल तयार पारेको थियो। प्रदेश २ का लागि अनुराधा चौधरीले उत्कृष्ट प्रदर्शन गरिन्। अनुराधा ६९ र कविता गौतम २ रनमा नटआउट रहे। शोभा आलेले २३, बिमला मगरले २१ रनको योगदान दिए।
कर्णाली प्रदेशका निशा पराजुलीले २ तथा सुजता बोगटीले १ विकेट लिइन्।
प्रतिक्रिया